У рэпетыцыйным цэнтралізаваным экзамене 28 студзеня возьмуць удзел усе выпускнікі школ Беларусі. Пра гэта сёння журналістам паведаміла прадстаўнік Міністэрства адукацыі Ірына Каржова, піша БелТА.
«Рэпетыцыя цэнтралізаванага экзамену пройдзе ва ўсіх рэгіёнах Беларусі, на ўсіх 144 пунктах. Усе навучэнцы 11-х класаў возьмуць удзел у рэпетыцыйным цэнтралізаваным экзамене. Наша задача — паглядзець гатоўнасць да правядзення ЦЭ і паправіць тыя тонкасці і нюансы, якія нельга ўбачыць, працуючы з дакументамі», — распавяла Ірына Каржова.
Рэпетыцыйны ЦЭ будзе праходзіць у строгай адпаведнасці з інструкцыяй па арганізацыі правядзення цэнтралізаванага экзамену. На яго ўжо адбылася рэгістрацыя выпускнікоў.
«Навучэнцы выбіраюць прадмет, па якім яны будуць рэпеціраваць правядзенне цэнтралізаванага экзамену. Далей будзе арганізаваная дастаўка дзяцей у пункты тэсціравання. Калі гэта сельская школа, то будзе арганізаваны падвоз, гэта значыць, органы ўпраўлення адукацыі змогуць змадэляваць арганізацыю падвозу навучэнцаў. Калі гаворка ідзе пра вялікія населеныя пункты, такія як Мінск, альбо абласныя цэнтры, з прадпрыемствамі транспарту трэба будзе прадугледзець павелічэнне грамадскага транспарту ў гэты час, каб будучыя абітурыенты змаглі пад'ехаць да пунктаў тэсціравання. На саміх пунктах будзе арганізаваны прапускны рэжым, рассадка па аўдыторыях. Рэспубліканскі інстытут кантролю ведаў рыхтуе валізы (паштовыя мяшкі), якія будуць дастаўляцца ў пункты правядзення цэнтралізаванага экзамену. Усё гэта мы плануем адпрацаваць 28 студзеня», — сказала прадстаўнік Мінадукацыі.
Цяпер чытаюць
Пратэжэ лукашэнкаўскага фаварыта Баскава будуе акадэмію ў Бразіліі і Нью-Васюкі сусветнага маштабу3
Каментары