«Мы толькі што пачулі дзвюх неймаверных жанчын». Джо Байдэн адгукнуўся на выступы Святланы Ціханоўскай і Наталлі Пінчук
«Мы толькі што пачулі дзвюх неймаверных жанчын, якія робяць неймаверную справу адносна Беларусі. Яны заслугоўваюць, як і ўсе жанчыны, быць прадстаўленымі», — цытуе словы амерыканскага прэзідэнта амбасада ЗША ў Беларусі.
На Другім саміце за дэмакратыю, які праходзіць у Вашынгтоне пад патранатам прэзідэнта ЗША, прадстаўніцы Беларусі Святлана Ціханоўская і Наталля Пінчук выступілі па чарзе ў анлайн-фармаце:
«Самая цяжкая навука, якую мы засвоілі за гэтыя гады, — гэта тое, што свабода ніколі не даецца бясплатна, яна прыходзіць з патрабаваннямі. І незалежнасць таксама не гарантаваная назаўжды.
Гэтыя каштоўнасці патрабуюць мужнасці, адказнасці і самаахвярнасці. Ім патрэбныя людзі, гатовыя ставіць інтарэсы іншых на першае месца», — сказала ў сваім выступленні Святлана Ціханоўская.
Наталля Пінчук, у сваю чаргу, заявіла, што перамены ў Беларусі — задача саміх беларусаў.
«Мы пачалі гэтую барацьбу, мы яе скончым. Але шлях мірнага, негвалтоўнага супраціву, які мы выбралі, будзе паспяховым толькі пры моцнай міжнароднай падтрымцы і салідарнасці».
Ціханоўская ж у сувязі з гэтым адзначыла, што «беларусы ўжо зрабілі свой выбар — выбар свабоднай еўрапейскай дэмакратычнай і стабільнай будучыні». Яна заклікала міжнародную супольнасць дапамагчы беларусам абараніць свой выбар і вярнуць сабе краіну.
Каментары