Гомельскія міліцыянты зрабілі справаздачу пра рэпрэсіі, а выпадкова паказалі расійскія ракетныя комплексы
На апублікаваным сёння відэа распавядаецца пра затрыманне «спячай ячэйкі экстрэмістаў» і захоп аднаго з грамадзян, які праводзіцца падраздзяленнем АМАПа ў адміністрацыйным будынку гомельскага аэрапорта.
На міліцэйскай здымцы на заднім плане добра відаць два ракетныя комплексы, звярнуў увагу «Флагшток».
Ракетныя комплексы на колавым шасі знаходзяцца каля ўзлётнай паласы. Імаверна, гэта ЗРК С-300 ці С-400 — сістэма СПА, якая таксама ўжываецца для нанясення ўдараў па Украіне.
Такім чынам міліцыянты самі адказалі на пытанне, што расійскія вайскова-транспартныя самалёты Ан-124 дастаўляюць у Гомель апошнія дні.
Раней «Беларускі Гаюн» паведамляў, што 30 сакавіка ў Гомельскім раёне была заўважана калона вайсковай тэхнікі, у якой перавозілі ракеты для ЗРК С-300/400. Па паведамленнях відавочцаў, калона рухалася ў кірунку аэрадрома Зябраўка, куды, як мяркуецца, перакідваюць ракеты і ЗРК С-400.
Таксама ў чацвер у Гомелі быў зафіксаваны чарговы прылёт звышцяжкага транспартнага самалёта ПКС РФ.
«Флагшток» падкрэслівае, што выкарыстанне гомельскага аэрапорта з'яўляецца важным індыкатарам вайсковай актыўнасці войска РФ у рэгіёне. Самалёты гэтай мадэлі бачылі ў гомельскім аэрапорце 25, 27, 28 і сёння — 30 сакавіка. Гэта найбольш актыўнае выкарыстанне аэрадрома з вясны 2022 года.
Разам з тым маштабнага перамяшчэння вайсковай тэхнікі па дарогах вобласці пакуль не назіраецца.
Цяпер чытаюць
Арыштаваны чыноўнік, які мог стаць наступным міністрам аховы здароўя10
Каментары