Палітвязням, якія вывесілі нацыянальныя сцягі Беларусі і Украіны, далі па 5 гадоў калоніі
У Мінскім гарадскім судзе 6 красавіка ў закрытым рэжыме вынеслі прысуд па «справе сцягоў», паведамляе «Вясна». Прысуд аказаўся вельмі суровым, большасць абвінавачаных атрымалі па 5 гадоў зняволення.
У сярэдзіне верасня 2022 года сілавікі затрымалі пяцярых мінчукоў за тое, што яны вывесілі вялікія нацыянальныя сцягі Беларусі і Украіны на фасадзе дома па вуліцы Лесі Украінкі ў Мінску. Гэта былі Дзяніс Варозаў, Вячаслаў Панцюшэнка, Вольга Церах, Уладзімір Лавор і Кацярына Зарэцкая.
Супраць гэтых людзей спачатку завялі крымінальную справу за «злоснае хуліганства», але ўжо праз два тыдні пасля затрымання МУС прызнала «экстрэмісцкім фармаваннем» канал у мабільным дадатку Zello, праз які камунікавалі мінчукі пры арганізацыі акцыі.
У выніку справу перакваліфікавалі на ч. 3 арт. 361-1 (стварэнне або ўдзел у «экстрэмісцкім фармаванні») і ч. 2 арт. 361-4 Крымінальнага кодэкса (садзейнічанне экстрэмісцкай дзейнасці).
Сёння суддзя Дзіна Кучук прызначыла чатыром абвінавачаным па пяць гадоў калоніі: Дзянісу Варозаву і Вячаславу Панцюшэнку — ва ўмовах узмоцненага рэжыму, Вользе Церах і Кацярыне Зарэцкай — ва ўмовах агульнага рэжыму.
Уладзіміру Лавору прысудзілі чатыры гады і дзевяць месяцаў зняволення ва ўмовах узмоцненага рэжыму.
На першым пасяджэнні дзяржаўны абвінаваўца заявіў хадайніцтва аб правядзенні працэсу ў закрытым рэжыме па «прычыне прадухілення распаўсюджвання экстрэмісцкіх матэрыялаў». Суддзя Кучук задаволіла хадайніцтва.
Сукамернікі Дзяніса Воразава распавядалі праваабаронцам пра яго жорсткае затрыманне: «Яго вывозілі ў лес і пагражалі забіць».
Чытайце таксама:
20 сакавіка пачнуць судзіць палітвязняў, якія вывесілі нацыянальныя сцягі Беларусі і Украіны
Затрымалі за вывешванне нацыянальных сцягоў Беларусі і Украіны, але судзіць будуць за «экстрэмізм»
МУС прызнала «экстрэмісцкім фармаваннем» суполку Xinkalik у праграме Zello, якім карыстаюцца кіроўцы
«Забіць яго ці адрэзаць яму яйцы я не рашыўся». Падрабязнасці трагедыі ў Гданьску, дзе ваяр катаваў бойфрэнда, а пасля забіў сябе45
Каментары