Разведка ЗША: Расія наўрад ці здольная на «значнае наступленне» ва Украіне сёлета
Расія, хутчэй за ўсё, не зможа правесці значную наступальную аперацыю ва Украіне сёлета праз недахоп боепрыпасаў і жывой сілы — незалежна ад таго, ці будзе паспяховым украінскае контрнаступленне. Пра гэта заявіла дырэктарка Нацыянальнай разведкі ЗША Аўрыл Гейнс, піша «Украінская праўда» на падставе паведамлення CNN.
«На самай справе, калі Расія не ініцыюе абавязковую мабілізацыю і не забяспечыць значныя пастаўкі боепрыпасаў ад трэціх бакоў у дадатак да ўжо наяўных паставак з Ірана і іншых краін, ёй будзе ўсё больш складана падтрымліваць нават сціплыя наступальныя аперацыі», — заявіла Гейнс у камітэце Сената па пытаннях Узброеных сіл.
Паводле яе слоў, Пуцін, імаверна, паменшыў свае кароткатэрміновыя амбіцыі ва Украіне, каб лічыць перамогай «кансалідацыю кантролю над акупаванай тэрыторыяй на ўсходзе і поўдні Украіны, а таксама забеспячэнне таго, што Украіна ніколі не стане членам НАТА».
Нягледзячы на гэтую ацэнку, Гейнс лічыць малаверагодным тое, што Расія дамовіцца пра паўзу ў гэтым годзе, калі толькі палітычныя фактары «не зменяць мысленне» Пуціна. Гейнс таксама адзначыла, што расійскія войскі рыхтуюць «новыя абарончыя пазіцыі» напярэдадні ўкраінскага контрнаступлення, і што яны «атрымалі менш тэрыторыі ў красавіку, чым у любы з трох папярэдніх месяцаў».
Каментары