Былога школьніка будуць судзіць за «кіраўніцтва экстрэмісцкім фармаваннем»
Чатырох маладых людзей затрымалі і будуць судзіць за кіраўніцтва так званым «экстрэмісцкім фармаваннем» у тэлеграме. Пра які тэлеграм-канал ідзе размова, не паведамляецца.
Па інфармацыі СК, у чэрвені мінулага года з 17-гадовым падлеткам з Касцюковічаў Магілёўскай вобласці звязаўся невядомы, які прапанаваў уступіць у закрытую групу ў тэлеграме. Хлопец нібыта стаў актыўным удзельнікам і адміністратарам групы. Да яго, па інфармацыі СК, далучыліся яшчэ трое аднадумцаў (19 і 27 гадоў).
Паводле СК, яны «распаўсюджвалі лжывыя экстрэмісцкія матэрыялы аб уцягванні Рэспублікі Беларусь у спецыяльную ваенную аперацыю», «заклікалі нападаць на супрацоўнікаў міліцыі і забіраць у іх зброю, спыняць вайсковую тэхніку», размяшчалі паведамленні «пра вядзенне дзейнасці тэрарыстычнай накіраванасці, у тым ліку па разбурэнне і пашкоджанне чыгуначных пуцей», «прымяненне зброі» і «кактэйляў Молатава» і г. д.
Дзеянні маладых людзей СК кваліфікаваў па некалькіх артыкулах Крымінальнага кодэкса Рэспублікі Беларусь:
- кіраўніцтва экстрэмісцкім фарміраваннем, уваходжанне асобы ў склад экстрэмісцкага фарміравання ў мэтах учынення злачынства экстрэмісцкай накіраванасці (удзел у экстрэмісцкім фарміраванні);
- садзейнічанне экстрэмісцкай дзейнасці, у тым ліку здзейсненае паўторна;
- наўмысныя дзеянні, накіраваныя на ўзбуджэнне нацыянальнай варожасці і варажнечы па прыкмеце нацыянальнай прыналежнасці.
Імёны затрыманых не называюцца.
Цяпер чытаюць
Скандал у «Еўраопце». 96‑гадоваму дзядулю не дазволілі прысесці на крэсла каля касы21
Каментары