«Беларусы, якія дома, чакайце нас». Былы рознарабочы з Лунінеччыны ваюе за Расію — узяў пазыўны «Бульба»
Праўладны тэлеграм-канал нядаўна паказаў яшчэ аднаго беларуса, які ваюе на баку Расіі. «Мы пераможам, усё ўладкуецца. Аніякай рэвалюцыі ў Беларусі не трэба», — кажа баявік у відэа. Хто ж ён?
Па інфармацыі «Нашай Нівы» і «Кіберпартызанаў», гэтага мужчыну, хутчэй за ўсё, клічуць Аляксандр Раманчук. Яму 40 гадоў, нарадзіўся ў вёсцы Лобча, якая знаходзіцца ў Лунінецкім раёне. Відаць, з дзяцінства меў праблемы са здароўем: з 12 да 15 гадоў Раманчук вучыўся ў Малечскай санаторнай школе-інтэрнаце, куды накіроўваюць дзяцей з праблемамі са здароўем, у прыватнасці, з захворваннямі шчытападобнай залозы, сардэчна-сасудзістай сістэмы, органаў дыхання і стрававання.
З 2001 па 2002 год Раманчук служыў у войску, у часці №1463 у Дзяржынску, якая займаецца матэрыяльна-тэхнічным забеспячэннем Памежнай службы.
Па звестках «Кіберпартызанаў», жонкі ў мужчыны няма. Працаваў ён рознарабочым і на будоўлі. У 2010-я паехаў у Расію. У 2017 годзе жыў у Падмаскоўі і нідзе не працаваў. У 2019-м — у Маскве і мае запазычанасць па нейкім займе ў прыкладна 50 даляраў, супраць яго нават пачыналі выканаўчую вытворчасць.
Як напісаў адзін з праўладных каналаў, мужчына мае пазыўны «Бульба», ваяваў на баку Расіі ў батальёне «Спарта», які раней узначальваў Арсен Паўлаў па мянушцы Матарола (баявік быў вядомы сваёй жорсткасцю, ён загінуў у 2016-м пры выбуху ў ліфце). Цяпер перайшоў у фармаванне «Каскад», якое непасрэдна падпарадкоўваецца ўладам марыянетачнай «ДНР».
У выкладзеным відэа «Бульба» кажа, што ён ваюе на баку Расіі каля васьмі гадоў і што ягоны камандзір таксама родам з Беларусі. Раманчук сцвярджае, што «беларусы ніколі не будуць жыць так, як на Захадзе, і атрымліваць тры-чатыры тысячы еўра, нічога не робячы».
«Беларусы, якія знаходзяцца дома, чакайце нас, перамога будзе за намі, набярыцеся цярпення. Мы пераможам, усё ўладкуецца, і будзе мір. Нікога не слухайце, не паддавайцеся на правакацыі. Аніякай рэвалюцыі ў Беларусі не трэба, рэвалюцыі да дабра не прыводзяць», — падсумоўвае мужчына.
Апошнім часам праўладныя каналы паказваюць усё больш баевікоў-беларусаў, якія ваююць на баку Расіі супраць Украіны. Робіцца гэта, магчыма, для таго, каб пераканаць у вялікай падтрымцы Расіі ў вайне з боку беларусаў.
Пры гэтым, згодна з беларускім Крымінальным кодэксам, наёмніцтва (артыкул 133) лічыцца злачынствам незалежна ад таго, на якім баку паехаў ваяваць найміт. Але пра гэты артыкул улады згадваюць чамусьці толькі ў дачыненні да ваяроў, якія паехалі абараняць Украіну.
Бывае, што за беларускіх баевікоў прапаганда выдае расіян. Так, нядаўна «беларус» з рэпартажу Азаронка, які ваюе за Расію, аказаўся ўраджэнцам Сургута.
«Наша Нiва» — бастыён беларушчыны
ПАДТРЫМАЦЬ
«Выскачыць на вуліцу ў кароткіх спаднічках — гэта вы маглі. І ўсіх гвалтавалі там». Лукашэнка ўспомніў кіношнікам 2020-ы і заклікаў спыніцца16
Каментары