Зрынуты прэзідэнт Нігера: Увесь рэгіён можа падпасці пад уплыў Расіі і ПВК «Вагнер»
Зрынуты вайсковай хунтай прэзідэнт Нігера Махамед Базум праз газету заклікаў ЗША і іншыя краіны дапамагчы яму ў аднаўленні канстытуцыйнага парадку і заявіў, што калі путчысты застануцца ва ўладзе, то ўвесь рэгіён Цэнтральнага Сахеля можа аказацца пад уплывам Расіі ў асобе ПВК «Вагнер», піша Бі-бі-сі.
«У гэтую цяжкую гадзіну я заклікаю ўрад Злучаных Штатаў і ўсю міжнародную супольнасць дапамагчы нам у аднаўленні канстытуцыйнага парадку», — напісаў Махамед Базум у калонцы ў амерыканскай газеце The Washington Post, якую ён пачаў словамі «Я пішу гэтыя радкі як закладнік».
У сваім закліку Махамед Базум асабліва адзначае, што вайсковая хунта Нігера хоча, як і хунты суседніх Малі і Буркіна-Фасо, запрасіць да сябе расійскую ПВК «Вагнер» замест французаў і амерыканцаў, якія дагэтуль дапамагалі Нігеру змагацца з групоўкамі ісламскіх радыкалаў.
«Увесь рэгіён Цэнтральнага Сахеля можа трапіць пад расійскі ўплыў праз групу «Вагнер», чые жорсткія тэрарыстычныя метады былі наглядна прадэманстраваныя ва Украіне», — піша Базум.
Зрынуты прэзідэнт заяўляе, што, насуперак сцвярджэнням вайскоўцаў-путчыстаў, дзякуючы дапамозе ЗША і Францыі, жыць у Нігеры ў апошнія два гады стала значна бяспечней: вылазкі ісламісцкіх груповак на поўдні, захадзе і поўначы краіны амаль спыніліся.
Махамед Базум — першы прэзідэнт Нігера, які мірна змяніў папярэдняга лідара краіны на дэмакратычных выбарах у 2021 годзе.
Сенегал гатовы да інтэрвенцыі
Тым часам Сенегал абвясціў, што гатовы паслаць войскі ў Нігер, калі так вырашыць альянс краін Заходняй Афрыкі ECOWAS. У канцы мінулага тыдня лідары краін ECOWAS прыгразілі путчыстам Нігера інтэрвенцыяй, калі яны на працягу тыдня не вернуць уладу прэзідэнту Базуму.
Як паведамляе агенцтва AFP, міністарка замежных спраў Сенегала Айсата Тал Сал сказала журналістам, што яшчэ адзін вайсковы пераварот у рэгіёне — гэта ўжо занадта, і таму сенегальскія вайскоўцы гатовыя адправіцца ў Нігер.
У нядзелю сотні дэманстрантаў сабраліся ля будынка французскай амбасады ў Ніямеі, некаторыя скандавалі: «Няхай жыве Расія», «Няхай жыве Пуцін» і «Далоў Францыю».
Яны таксама падпалілі сцены пасольскага комплексу.
Пры гэтым у сваім выступе генерал Чыяні заявіў, што французскія грамадзяне ў Нігеры ніколі не падвяргаліся «ніякай пагрозе».
Нігер, дзе знаходзяцца вайсковыя базы Францыі і ЗША, — адзін з ключавых саюзнікаў Захаду ў барацьбе з джыхадзісцкім экстрэмізмам у Сахелі.
Пасля таго, як у 2021 годзе вайсковае кіраўніцтва суседняй Малі прыняло рашэнне аб супрацоўніцтве з расійскай ПВК «Вагнер», Францыя перанесла цэнтр сваіх рэгіянальных контртэрарыстычных аперацый у Нігер.
Нігер — буйны вытворца ўрану. Краіна ляжыць на асноўным маршруце міграцыі ў Паўночную Афрыку і Міжземнамор'е.
Цяпер чытаюць
У Лагойску пекар адмаўляецца прадаваць свой хлеб пакупнікам, у якіх ёсць сабакі70
Каментары