Генеральная пракуратура ведае, як змагацца з карупцыяй
Генеральная пракуратура ўнесла прэзідэнту прапановы, скіраваныя на ўзмацненне барацьбы з карупцыяй,
паведаміў журналістам 11 снежня начальнік упраўлення па барацьбе з арганізаванай злачыннасцю і карупцыяй Генпракуратуры Аляксандр Ракевіч.
У пятніцу гэта праблематыка абмяркоўваецца на канферэнцыі ў Белдзяржуніверсітэце. Мерапрыемства прысвечана пытанням каардынацыі дзейнасці ўсіх органаў улады ў сферы барацьбы з карупцыяй, прававому забеспячэнню гэтага працэсу.
Паводле слоў Ракевіча, прапановы тычацца, у прыватнасці, дэкларавання даходаў чыноўнікаў, адказнасці ўрада, міністэрстваў і ведамстваў, мясцовых органаў улады за працу ў сферы супрацьдзеяння карупцыі.
Ракевіч адзначыў, што барацьба з карупцыяй асабліва важная ва ўмовах фінансавага крызісу. Паводле яго слоў, з’яўляюцца новыя спосабы ўчынення карупцыйных злачынстваў і новыя спосабы іх маскіроўкі. Цяпер, заявіў прадстаўнік Генпракуратуры, асаблівую ўвагу неабходна надаць крадзяжам з дапамогай інтэрнета, пераводу грошай у афшорныя зоны, злачынствам у сферы дзяржзакупак і прыватызацыі.
Ракевіч таксама падкрэсліў, што ўсе заўвагі, выказаныя ў адрас органаў пракуратуры на нарадзе ў прэзідэнта 8 жніўня гэтага года, улічаны. Пра гэта сведчыць, у прыватнасці, тое, што за 11 месяцаў у краіне выяўлена карупцыйных злачынстваў на 17% больш, чым за ўвесь мінулы год. «Праца па супрацьдзеянні карупцыі цяпер носіць больш скаардынаваны характар», — заявіў прадстаўнік Генпракуратуры.
Каментары