Стала вядома, куды паставілі дырэктарам памілаванага Крыштаповіча. Папярэднюю начальніцу нядаўна пасадзілі
Міхаіл Крыштаповіч, былы дырэктар Гарадзейскага цукровага камбіната, які пусціў пад адхон кар'еру Шуневіча і сам атрымаў прысуд у 13 год, нядаўна выйшаў па памілаванні і атрымаў у кіраванне гаспадарку. Гэта вялікі свінакомплекс у Гомельскай вобласці, дзе папярэднюю дырэктарку два месяцы таму пасадзілі на 4 гады.
Нядаўна «Наша Ніва» паведамляла пра тое, што выйшаў на волю былы дырэктар Гарадзейскага цукровага камбіната, які ў 2021-м быў асуджаны на 13 гадоў калоніі за хабарніцтва ў асабліва буйным памеры.
Чытайце таксама: Асуджаны на 13 гадоў Міхаіл Крыштаповіч папрасіў памілавання ў Лукашэнкі і выйшаў на волю, атрымаўшы ў вотчыну калгас
Некалі, каб яго затрымаць, разварочвалі самалёт.
Як стала вядома цяпер, Крыштаповіч атрымаў у кіраванне не проста нейкі закінуты калгас, а аргакамбінат «Холмеч» у Рэчыцкім раёне.
Гэта вялікая гаспадарка, чый асноўны профіль — свінагадоўля.
Папярэднюю кіраўніцу «Холмечы» літаральна гэтым летам асудзілі: «Гомельская праўда» паведамляла, што 58-гадовая дырэктарка «Холмечы» нібыта загадвала сваім падначаленым скажаць звесткі аб падзяжы скаціны і змяншэнні прыплоду ў свінняў.
За перавышэнне паўнамоцтваў жанчыне прысудзілі штраф 11 тысяч рублёў і 4 гады калоніі агульнага рэжыму.
На пачатку 2020-га самалёт «Белавія», які ляцеў у Мюнхен, развярнулі на загад Лукашэнкі і пасадзілі ў Гродне. У самалёце быў у тым ліку Міхаіл Крыштаповіч, на той час — дырэктар Гарадзейскага цукровага камбіната. Па прызямленні яго арыштаваў КДБ.
Па «справе цукровых заводаў» праходзіла некалькі дырэктараў заводаў (жабінкаўскага, слуцкага, скідзельскага і гарадзейскага), а таксама некалькі камерсантаў і намеснік Карпянкова ў ГУБАЗіКу — начальнік 2-га ўпраўлення Уладзімір Ціхіня.
Былы міністр МУС Ігар Шуневіч таксама фігураваў у гэтай справе — на яго давалі паказанні ўдзельнікі гісторыі. Але судзіць яго не сталі.
КДБ заявіў, што праз дзеянне гэтай групы бюджэт недалічыўся 70 мільёнаў даляраў. Сама схема заключалася ў адгрузцы пасярэднікам цукру па стратных цэнах з наступнай рэалізацыяй праз неабавязковую пракладку па завышанай цане. Чыноўнікі з гэтага мелі долю, як і Ціхіня, які кансультаваў змоўшчыкаў на прадмет бяспекі і інтарэсу да іх сумежных органаў.
У 2021-м многія (апроч Ціхіні, які выйшаў перад выбарамі апрацоўваць крымінальны элемент для барацьбы з апазіцыяй), атрымалі тэрміны.
Крыштаповіч атрымаў 13 гадоў калоніі. Адбываў тэрмін у Бабруйску.
Шматразовыя хадайніцтвы Крыштаповіча на імя Лукашэнкі аб памілаванні далі плён, і Крыштаповіч быў памілаваны.
«Наша Нiва» — бастыён беларушчыны
ПАДТРЫМАЦЬЦяпер чытаюць
Трэнд сярод беларускіх зумераў і міленіялаў: усё больш моладзі вяртаецца жыць да бацькоў13
Каментары