Беларуская дызайнерка адкрыла ў Варшаве творчую прастору — «Дом Буслоў»
Прастора для фэшн-беларусаў з'явілася на вуліцы Адама Міцкевіча ў польскай сталіцы. У вітрыне — дызайнерскія вырабы, на шкле — назва на трох мовах: на беларускай, польскай і англійскай. «Запрашаем усіх, хто хоча болей даведацца пра Беларусь», — тлумачыць гаспадыня і стваральніца творчай прасторы Вольга Кардаш.
Больш, чым проста крама
У цэнтры Мінска Вольга мела краму ўласнага адзення. У пратэсным жніўні 2020-га яна стварыла серыю цішотак з лагатыпамі прадпрыемстваў, дзе адбываліся страйкі. І гэта быў апошні праект дызайнеркі ў Беларусі: жыць у несвабоднай краіне яна не захацела, і ўжо ў верасні пераехала ў Польшчу.
Цяпер у Варшаве яна ўвасабляе сваю даўнюю мару — стварыць прастору, дзе можна пазнаёміцца з творчасцю мастакоў, дызайнераў мэблі, адзення і аксесуараў, нешта набыць і чамусьці навучыцца.
«Я назвала прастору «Дом буслоў», бо буслы — мая даўняя любоў, — кажа Вольга Кардаш. — Гэта хэдлайнер майго брэнда. Работы з бусламі ў мяне заўсёды былі, ёсць і будуць, і сёння тут ужо можна ўбачыць адзенне з розных маіх калекцый. І ўвогуле бусел для беларусаў вельмі важная птушка, дый для палякаў таксама не чужая. А яшчэ, з улікам таго, што Варшава — гэта такі транзітны горад, праз які праязджае шмат турыстаў, мы хочам, каб наша прастора была цікавая і замежным гасцям. Каб людзі з розных краін знаёміліся з творчым жыццём беларусаў.
У «Доме буслоў» можна паглядзець і набыць адзенне, біжутэрыю, карціны, а яшчэ — замовіць мэблю, узоры якой бачаць наведнікі. І гэта не адзінае адрозненне творчай прасторы ад тыповага мастацкага салона або шоў-рума.
Тут чакаюць беларускіх чытачоў
«Дом буслоў» мае стаць яшчэ і міні-кнігарняй. Гэтым займаецца Наста Ганчарова, якая арганізавала ў Варшаве літаратурны клуб, а цяпер яшчэ й шукае магчымасцяў наладзіць продаж беларускай літаратуры.
«Я была на фестывалі «Прадмова», пазнаёмілася з многімі аўтарамі, і зараз планую, як дастаўляць беларускія кнігі ў Варшаву. Хочацца, каб людзі дакладна ведалі: у «Доме буслоў» яны прадаюцца. Бо мы разумеем, што да нас будуць заходзіць тыя, хто апынуўся за мяжой па волі лёсу, у эміграцыі. Для іх павінны быць «пункт», дзе можна набыць беларускую кнігу, каб не так востра адчуваць адарванасць ад радзімы», — гаворыць Наста.
Першая з літаратурных навінак, якая ўжо з'явілася на паліцах, — гэта «Падарожжы Бенджаміна Трэцяга» з ілюстрацыямі Міці Післяка — беларускага ілюстратара, які жыве ў Нью-Ёрку.
Яшчэ адна ідэя, якую хочуць ажыццявіць у «Доме буслоў», — гэта прэзентацыі кніг з удзелам аўтараў, сяброўскія сустрэчы з маладымі беларускімі літаратарамі.
Першы майстар-клас будзе прысвечаны «павукам»
Сярод аўтарскіх прац, прадстаўленых у «Доме буслоў» — незвычайныя завушніцы ў выглядзе «павукоў», традыцыйнай для Беларусі дэкаратыўнай канструкцыі з саломы. «Павукоў» рабілі перад Калядамі і чаплялі да столі як абярэг ад злых сілаў. Праз год яго спальвалі, а ў хаце з'яўляўся новы. Гэтая традыцыя натхніла беларускую дызайнерку Насту, стваральніцу брэнду «Канва»:
«Я люблю працаваць з саломай, ёсць у мяне і саламяныя завушніцы. Аднойчы я падумала: а што, калі зрабіць завушніцы — «павукі»? Знайшла лёгкі метал, завушніцы ў мяне ёсць і залацістыя, і цёмныя. Гэта асноўны профіль маёй творчасці — павукі, абярэгі, і ў кожны пакуначак для пакупнікоў я кладу тлумачэнні на паперы, што гэта за сімвал. І якраз на Хэлаўін, днямі, буду праводзіць тут такі павучыны шабаш — майстар-клас па «павуках». Іх робяць перад Калядамі, але чаму б не цяпер — калі настаюць такія цёмныя магічныя вечары».
У Мінску вырабы Насты прадаваліся ў сувенірнай краме мастацкага музея, на рамесніцкіх кірмашах. Было шмат магчымасцяў для гандлю, але пасля падзей 2020 года давялося з'ехаць. Цяпер дзяўчына супрацоўнічае з «Домам буслоў», іншымі беларускімі пляцоўкамі і стварае саламяныя творы. Салома, праўда, цяпер польская. Затое традыцыя — родная.
Каментары