Ціханоўская правяла ў Вільні брыфінг з пасламі 30-ці краін, сярод якіх і пасол Арменіі
Гэта самая вялікая сустрэча з дыпламатамі, якую Святлана Ціханоўская мела ў Вільні. У брыфінгу ўдзельнічалі паслы большасці краін Еўрасаюза, а таксама Вялікабрытаніі, Нарвегіі, Японіі, Ізраіля, Канады і нават Малдовы і Арменіі.
Сустрэчу арганізавала пасольства Іспаніі ў Вільні, якая старшынюе цяпер у Еўрапейскім саюзе. На сустрэчу запрасілі як дыпламатаў з краінаў ЕС, так і іншых краінаў, акрэдытаваных у Літве.
Усяго ў сустрэчы ўзялі ўдзел паслы наступных краін:
Бельгія, Кіпр, Люксембург, Балгарыя, Чэшская Рэспубліка, Венгрыя, Румынія, Нямеччына, Латвія, Данія, Эстонія, Фінляндыя, Швецыя, Італія, Францыя, Нідэрланды, Іспанія, Ірландыя, Грэцыя, Польшча, Харватыя, Вялікабрытанія, Нарвегія, Японія, Арменія, Ізраіль, Малдова, Канада.
Звяртае на сябе ўвагу прысутнасць сярод іншых дыпламатаў пасла Арменіі, якая яшчэ нядаўна была саюзніцай Расіі, але цяпер усё больш заўважна мяняе палітычную арыентацыю на празаходнюю.
Падчас сустрэчы Ціханоўская распавяла пра сітуацыю з палітвязнем Міколам Статкевічам, калі вестак пра яго няма настолькі доўга, што ходзяць чуткі нават пра яго смерць, а таксама пра іншых палітвязняў, многія з якіх знаходзяцца ў няволі ў цяжкім стане.
«Паважаныя дыпламаты, прашу вашай дапамогі. Я прашу вас і вашыя сталіцы публічна запатрабаваць доступу да палітвязняў, запатрабаваць іх неадкладнага вызвалення і заклікаць інстытуты ААН звярнуць увагу на гэтую сітуацыю. Без ціску і міжнароднай увагі рэжым працягне забіваць нашых людзей за кратамі», — адзначыла Ціханоўская.
Таксама яна падкрэсліла важнасць тэмы «Еўрапейская будучыня Беларусі — Еўрапейскі Саюз», пад знакам якой будзе праходзіць 2024 год:
«Сёння нам не патрэбны абяцанні сяброўства; пра гэта гаварыць заўчасна. Але мы можам пачаць рыхтаваць, напрыклад, пагадненне аб асацыяцыі. Нам патрэбны сігнал аб тым, што дзверы Еўропы будуць адчынены для нашай краіны ў будучыні.
Мы павінны паказаць беларусам усе перавагі быць з Еўропай, а не з Расіяй», — заявіла дэмакратычная лідарка.
Таксама на сустрэчы гаварылі пра падтрымку рэпрэсаваных рэжымам і пра пытанні легалізацыі беларусаў ды выдачу пашпартоў замежніка.
Цяпер чытаюць
У кадр зноў трапіла, якім памерам шрыфта для Лукашэнкі друкуюць выступы, каб ён бачыў16
Каментары