Праект Reform.by на мяжы закрыцця. Пра гэта напісаў галоўны рэдактар Reform.by Фёдар Паўлючэнка. У рэдакцыі засталося грошай на паўтара-два месяцы працы.
Як піша Паўлючэнка, 19 снежня 2023 года рэдакцыя атрымала адмову ў падтрымцы ад ключавога еўрапейскага інстытуцыйнага донара. «Тлумачэнняў мы не атрымалі, яны і не меліся на ўвазе. Мы паважаем гэтае рашэнне, хоць і не можам з ім пагадзіцца», — піша ён.
Reform.by як паўнавартаснае медыя было створанае ў жніўні 2018 года. Яго ініцыявалі трое журналістаў з вялікім досведам працы — Аляксей Жукаў, Аляксандр Атрошчанкаў і Фёдар Паўлючэнка.
«У нас быў дакладны план на 3-4 гады, якім чынам мы знойдзем сваё месца на вельмі канкурэнтным рынку. Да лета 2020 года наш сайт наведвала каля 100 тысяч беларускіх карыстальнікаў кожны дзень, і мы цалкам маглі фінансаваць сябе за кошт рэкламы. Нядрэнны вынік для двух гадоў працы медыястартапу», — піша ён.
Выданне асвятляла падзеі 2020 года ў краіне. «Дзякуючы папярэдняй падрыхтоўцы, толькі Reform.by быў даступны для карыстальнікаў з Беларусі ў жніўні, у тыя некалькі дзён блакіроўкі знешняга інтэрнета. Аднаму богу вядома, колькі наведвальнікаў у нас было ў тыя дні — лічыльнікі не працавалі», — піша галоўрэд.
Паводле Паўлючэнкі, у 2021 годзе ў сярэднім кожны дзень ад 300 да 500 тысяч беларусаў чытала матэрыялы выдання.
Reform.by ацанілі не толькі чытачы, але і ўлады. Пачаліся пераследы журналістаў, крымінальныя справы, допыты. Рэдакцыя зʼехала з краіны своечасова, ніхто ў турму не патрапіў. У жніўні 2021 года Мінінфарм заблакаваў дамен для беларускіх карыстальнікаў.
Пасля пачатку поўнамаштабнай вайны блакіроўку пачалі і расійскія цэнзары. Сайт выкінулі з расійскіх агрэгатараў навін і заблакавалі ў Расіі.
Рэдакцыя прыклала максімум намаганняў, каб прадоўжыць працу за межамі Беларусі.
«Я ганаруся тым, што мы паспелі зрабіць за гэтыя 5 год. Нашы журналісты праводзілі адны з самых складаных і рэзанансных расследаванняў, наш «Ігар Лянкевіч» — адзін з лепшых грамадска-палітычных аналітыкаў, Саша Атрошчанкаў робіць вельмі добрыя інтэрвʼю, з намі супрацоўнічае адзін з найлепшых журналістаў па культурнай тэматыцы, мы робім адну з найлепшых, калі не самую лепшую стужку навін у краіне. Нашу працу адзначылі — рэдакцыя Reform.by стала лаўрэатам прэміі ў галіне свабоды СМІ Free Media Awards за 2023 год», — піша галоўрэд.
Нягледзячы на гэта, рэдакцыя ад аднаго з донараў атрымала адмову ў гранце на той падставе, што не змаглі адаптавацца да новай рэальнасці і страцілі аўдыторыю.
«Так, цалкам згодзен. Заблакаваныя ўсюды, з сярэднім 12-гадзінным працоўным днём без выхадных, у чужой краіне і заробкам ніжэй, чым у «Жабцы» — нашы магчымасці ствараць новыя рэвалюцыйныя прадукты некалькі абмежаваныя. У нас ні разу не было сітуацыі, калі мы маглі б проста ўзяць аднаго новага чалавека і крыху больш часу выдаткаваць на развіццё. Грошай заўсёды было на 3-4 месяцы», — піша Паўлючэнка.
Ён просіць пра дапамогу калег, актывістаў, палітыкаў, партнёраў — дапамагчы захаваць праект.
Таксама ён звярнуўся да чытачоў.
«Любімыя нашы чытачы, проста заставайцеся з намі! А калі ёсць магчымасць, падтрымайце данатам, ну а раптам. Калі няма магчымасці, падпішыцеся на наш тэлеграм-канал! Дзякуй», — напісаў галоўны рэдактар Reform.by.
-
«Гісторыя не выклікае даверу». Польшча перадала Літве справу аб міжнароднай абароне беларускі, якая часта ездзіла ў камандзіроўкі
-
Не толькі легендарны «Супер 8». Якія яшчэ атракцыёны не будуць працаваць у Мінску ў гэтым сезоне
-
Ціханоўская пра высылку з Беларусі ў жніўні 2020: Мне далі на зборы 20 хвілін
Каментары