У ЗША сталі менш баяцца, што перадача ATACMS Украіне расцвяліць Пуціна
Старшыня Аб'яднанага камітэта начальнікаў штабоў ЗША Чарльз Браўн заявіў, што рызыкі эскалацыі вайны, звязаныя з пастаўкай дальнабойных ракет ATACMS Украіне, сёння зменшыліся ў параўнанні з тым, якімі яны былі раней. Пра гэта Браўн сказаў перад журналістамі 29 сакавіка, піша «Еўрапейская праўда» на падставе матэрыялаў амерыканскай прэсы.
Чарльз Браўн адзначыў, што стрыманы адказ Расіі на серыю нядаўніх нападаў украінскіх беспілотнікаў на аб'екты, што знаходзяцца на яе тэрыторыі, дазволіў Пентагону скарэктаваць свой аналіз эскалацыйнай рызыкі праз адпраўку ATACMS.
«Гэта тое, на што мы… звяртаем увагу. Якая верагоднасць эскалацыі на аснове… розных магчымасцяў і розных дзеянняў», — сказаў генерал.
Аглядальнікі і некаторыя заканадаўцы-рэспубліканцы раней настойвалі на тым, каб Злучаныя Штаты накіравалі ракеты ATACMS Кіеву, паколькі гэта дазволіла б украінскім сілам ствараць небяспеку для расійскіх пазіцый, уключаючы размешчаныя ў даўно анексаваным Крыме. Выкарыстанне гэтых ракет абцяжарыла б прасоўванне Расіі, паколькі Украіна магла б працягваць наносіць удары нават па найбольш умацаваных расійскіх пазіцыях практычна з любога месца.
Некаторыя аглядальнікі гавораць, што калі Кангрэс ЗША не прыме дадатковы пакет дапамогі Украіне на 60 млрд даляраў, Расея можа захапіць больш тэрыторый ужо гэтай вясной. Чарльз Браўн заклікаў да хуткага прыняцця пакета падтрымкі і сказаў, што Украіна сутыкнецца з працягам артылерыйскіх абстрэлаў у агляднай будучыні.
Ён, аднак, таксама адзначыў, што асцярогі з нагоды маштабнага вясновага расійскага наступу могуць быць перабольшанымі.
«Я не ведаю, ці змогуць расейцы правесці вялікі наступ. Калі глядзець… што адбылося цягам… мінулага года, то расейцы фактычна кінулі шмат магчымасцяў і асабовага складу, сістэм узбраення і транспартных сродкаў, каб атрымаць тое, што яны атрымалі. І, як я б сказаў, гэта амаль мясарубка», — адзначыў Браўн.
Нядаўна СМІ паведамлялі, што Пентагон гатовы перадаць Украіне дальнабойныя ракеты ATACMS далёкасцю больш за 180 міляў (прыкладна 290 км). Аднак афіцыйна ў Пентагоне гэтага не пацвердзілі.
На прэс-канферэнцыі ў лютым прэзідэнт Украіны Уладзімір Зяленскі расказаў, што мае станоўчы настрой адносна магчымай пастаўкі дальнабойнай зброі, у прыватнасці ATACMS, пасля апошніх перамоў з заходнімі партнёрамі.
Чаму Макрон раптам загаварыў пра магчымы ўвод заходніх войскаў ва Украіну
Дэпутаты Бундэстага прагаласавалі супраць паставак Украіне ракет Taurus
Вялікабрытанія, верагодна, паставіла Украіне ракеты з большай дальнабойнасцю, чым заяўлялася
«Патрэбныя новыя тэхналогіі, каб прарвацца ў такой вайне». Залужны апублікаваў новы праграмны артыкул
Цяпер чытаюць
Арыштаваны чыноўнік, які мог стаць наступным міністрам аховы здароўя8
Каментары