Лукашэнка расказаў сваю версію, за што перасаджаў журналістаў у Беларусі
Аляксандр Лукашэнка выступіў у Магілёве на так званым Форуме медыйнай супольнасці Беларусі. Там ён заклікаў узмацняць «прапаганду і контрпрапаганду, ідэалагічную працу».
«Трэба ўзмацняць прапаганду і контрпрапаганду, ідэалагічную работу. Хачу, каб маладыя журналісты гэта засвоілі, — сказаў Лукашэнка. — Не трэба саромецца гэтых слоў і паняццяў. Ці на Захадзе іх няма? Ёсць. Проста назвалі іншым словам — піяр, гэта значыць работа з грамадскай думкай. Сутнасць адна», — лічыць Лукашэнка.
Ён мяркуе, што словы пра дэмакратычныя каштоўнасці — гэта балбатня.
«Нас не трэба карміць рознага роду балбатнёй аб нібыта незалежных СМІ, дэмакратычных каштоўнасцях. Мы ж бачым, як яны кідаюць у турмы сваіх журналістаў, закрываючы медыя і пераследуючы кожнага, хто асмеліўся не пагадзіцца з палітыкай і дзеяннямі ўлад», — дзеліцца сваёй карцінаю свету Аляксандр Лукашэнка. На яго думку, такое адбываецца «ад ЗША і Еўразвяза да Малдовы, Прыбалтыкі, Украіны і Грузіі».
Лукашэнка зазначыў, што некаторыя з прысутных могуць сказаць, што такое ж было ў Беларусі ў 2020 годзе.
«Было, — адказаў сам сабе Лукашэнка. — Але мы не хапалі іх за меркаванне і не саджалі іх там турму <…> Мы іх спрабавалі пакараць — праўда, не пакаралі — за здраду. Вы ж каля гэтай кармушкі рохкалі, вам было добра — палацы, аўтамабілі і іншае (не хачу пры дзеўчынах казаць) — усё ў вас было. Прозвішчы ведаеце. Вам было добра, потым ветрык дзьмухнуў з іншага боку, і вы не проста пачалі выказвацца (бывае, меркаванне мяняе чалавек, што тут такога), але вы пачалі ламаць і крышыць краіну. А вы былі ўпэўненыя, што ўсе гэтага хочуць? Вось мы змагаліся супраць гэтага. У тым ліку і спаганялі з журналістаў. За парушэнне закона», — сказаў Лукашэнка.
Паводле БАЖ, цяпер у зняволенні знаходзяцца 35 журналістаў. Усе яны прызнаныя палітзняволеннымі. Амаль усе рэдакцыі незалежных СМІ вымушаны былі з'ехаць з краіны. СМІ, якія засталіся ў Беларусі, вымушаны альбо падтрымліваць палітыку Лукашэнкі, альбо цалкам выключыць тэму палітыкі са сваіх публікацый.
У Індэксе свабоды прэсы, апублікаваным у 2024-м «Рэпарцёрамі без межаў», Беларусь за год апусцілася на 10 пазіцый і знаходзіцца цяпер на 167‑м месцы са 180. Яна аказалася сярод 36 краін, стан свабоды прэсы ў якіх ацэньваецца як «вельмі дрэнны».
Цяпер чытаюць
Вялікая гутарка з Лесяй Руднік пра сэксізм, мужа-рэслера, заробак доктаркі навук у Швецыі, апазіцыю і памылку Еўрасаюза19
Каментары
Гэта лукашэнка ўжо трэнуецца, што ён менавіта будзе ўсклікаць з лавы падсудных? Ну калі ягоныя халуі-прапагандысты адзінагалосна пачнуць сведчыць супраць былога гаспадара, каб адмыцца?