ЗША абвясцілі ўзнагароду да 10 мільёнаў даляраў за інфармацыю пра расійскі тэлеграм-канал «Рыбарь»
Расійскі праект «Рыбарь» у ЗША абвінавачваюць ва ўмяшанні ў амерыканскія выбары, таму на сайце праграмы «Узнагароджанне за дапамогу правасуддзя» Дзярждэпартамента ЗША абвясцілі вялікую ўзнагароду за інфармацыю пра гэты канал і яго рэдактараў ды супрацоўнікаў.
У паведамленні сцвярджаецца, што «Рыбарь» — гэта расійская медыяарганізацыя, якую раней фінансаваў Яўген Прыгожын. Цяпер яе нібыта фінансуе «Растэх». За інфармацыю пра гэтую арганізацыю амерыканцы гатовыя заплаціць вялікія грошы — да 10 мільёнаў даляраў.
Паводле версіі ўладаў ЗША, «Рыбарь» прасоўвае «прарасійскія і антызаходнія ідэалагічныя ўстаноўкі», «кіруючы прапагандысцкімі медыя-каналамі» і твітар-акаўнтамі. Яго таксама абвінавачваюць у тым, што ён спрабаваў «пасеяць разлад, спрыяў сацыяльным рознагалоссям, распальваў міжпартыйную і расавую варожасць, заклікаў да нянавісці і гвалту ў Злучаных Штатах».
Улады ЗША цікавіць інфармацыя пра дзевяць чалавек з каманды «Рыбаря». У прыватнасці, гэта дырэктар праекта Міхаіл Звінчук.
Праект «Рыбарь» існуе некалькі гадоў. На сайце праекта сказана, што ён існуе нібыта на народныя ахвяраванні і займаецца «пытаннямі вайсковай аналітыкі, інфармацыйнай вайны і візуальнай прапаганды».
У сакавіку 2023 года было заснавана ТАА «Рыбарь». Яго генеральным дырэктарам і сузаснавальнікам з'яўляецца Міхаіл Звінчук, а Валерыя Звінчук — другім з трох сузаснавальнікаў.
Каментары