Экс-міністр інфармацыі Луцкі стаў весці «Контуры» на канале АНТ — які сам і ўзначальвае
Былы галоўны ідэолаг краіны вярнуў праграму ў эфір і сам стаў у кадр.
АНТ напярэдадні прадставіў старую новую выніковую інфармацыйную праграму. У эфір вярнуліся звыклыя «Контуры», але з новым вядоўцам. Працаваць у кадры стаў кіраўнік тэлеканала Ігар Луцкі.
«Контуры» закрылі летась. Апошні выпуск старой праграмы выйшаў 27 жніўня, яго вёў Ігар Позняк. Пасля гэтага па нядзелях выходзіла іншая выніковая праграма — «Наш час».
Цяжка сказаць, што змянілася з перазапускам праграмы. Фармат застаўся ранейшым — асноўныя, паводле меркавання аўтараў, сюжэты за тыдзень з каментаром новага вядоўцы. Яго асоба — гэта, уласна, і ёсць галоўная навінка, дзеля якой, магчыма, «Контуры» і вярнуліся ў эфір.
Луцкі вырашыў дапоўніць звыклую ролю адміністратара не зусім звыклай роляй вядоўцы — і адразу ў галоўнай інфармацыйнай праграме канала. У першым выпуску адсутнасць адпаведнага досведу ў экс-міністра інфармацыі кідалася ў вочы.
Ігар Луцкі ўзначаліў АНТ у чэрвені, змяніўшы Марата Маркава, які пайшоў на павышэнне ва ўрад. Да гэтага выпускнік факультэта радыёфізікі БДУ працаваў у прафсаюзах, быў намеснікам дырэктара БелТА, намеснікам міністра інфармацыі і дырэктарам СТВ.
Улетку 2020-га ён узначаліў Мінінфарм, у красавіку 2021-га заняў крэсла галоўнага ідэолага ў адміністрацыі Лукашэнкі і стаў адным з галоўных архітэктараў рэпрэсій супраць незалежных СМІ. Пры Луцкім практычна ўсе непадкантрольныя ўладам медыя былі прызнаныя «экстрэмісцкімі» і выціснутыя з краіны.
Цяпер чытаюць
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін2
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1414
Каментары