Палкоўнік пахваліўся, як яго сын вучыўся ў ваенна-патрыятычным класе, а пасля быў вартаўніком пры ваенкамаце
Былы ваенны камісар Магілёўскай вобласці Аляксандр Гарошкін расказаў, як выхоўвае сына. Праз месяц у арміі той звяртаўся да бацькі «таварыш палкоўнік».
Палкоўнік Аляксандр Гарошкін, які цяпер сенатар, пахваліўся, што свайго сына, калі той вучыўся ў школе, спецыяльна перавёў у патрыятычны клас.
«Я бачыў, што, на жаль, нашымі дзецьмі, у мяне, як у бацькі, часу займацца не было. Я чужымі дзецьмі займаўся. Сваім не было калі. (…) Школы, дзе ў асноўным жанчыны. (…) У нас з ім была дамоўленасць. Ён вучыўся ў адной школе, добрай, прэстыжнай школе ў цэнтры горада. А ваенна-патрыятычны клас у нас у школе, што на ўскрайку горада побач з вайсковай часцю. (…)
Я кажу: «Сынок, давай паспрабуй. Чвэрць. Калі табе там не спадабаецца (там у форме трэба хадзіць, дадатковыя заняткі і гэтак далей), вернешся ў гэтую школу. Я абяцаю».
Не. Ён праз месяц стаў гімн спяваць. Гэта працэс выхавання», — падзяліўся ўспамінамі мужчына ў праграме «Скажинемолчи» на БТ.
Але пасля школы сын абраў цывільную прафесію. «Я бачыў, што ён не ваенны чалавек», — заўважыў Гарошкін і падкрэсліў, што не стаў прымушаць сына ісці ў Вайсковую акадэмію.
«Я кажу: «Добра, у цывільную ВНУ. Калі ты потым усё ж захочаш стаць афіцэрам, у нас жа цяпер гэта элементарна ўсё робіцца. Заканчваеш цывільную ВНУ, служыш тэрміновую службу, цябе атэстуюць, і далей ты можаш пайсці афіцэрам, калі гэта будзе тваё».
Па словах Гарошкіна, на працягу чатырох гадоў вучобы ва ўніверсітэце на дзённым аддзяленні яго сын падпрацоўваў у ваенкамаце вартаўніком. Пасля заканчэння вучобы хлопец быў прызваны ў пагранічныя войскі.
Палкоўнік расказаў, што ў якасці ганаровага госця прысутнічаў на прыняцці ваеннай прысягі ва ўзводзе, дзе служыць сын. Гарошкін згадаў «паказальны момант», які адбыўся пасля таго, як прайшла ўрачыстасць:
«Прайшоў усяго месяц, як ён з'ехаў з дому. (…) Праз месяц, як іх адпусцілі пасля прысягі, ён да мяне [звяртаецца] «таварыш палкоўнік». Я кажу: «Сынок, так мы ж ужо не на прысязе». Разумееце? Месяц — і ён бачыць чалавека ў пагонах, і ў яго ўжо… А што будзе праз год? (…) Для мужчыны гэта трэба».
Цяпер чытаюць
Стала вядома, дзе працуе фаварытка Лукашэнкі Уладлена Зайцава14
Каментары