Бывае складана разабрацца, якое кіно вартае прагляду. Расказваем пра некалькі платформаў, якія дапамогуць даць рады гэтай задачы.
Адразу агаворымся, што ў гэтай падборцы будуць англамоўныя рэсурсы, бо аналагічных рэсурсаў на беларускай мове не існуе. Ёсць, канечне, рускамоўныя рэсурсы, той жа анлайн-кінатэатр «Кінапошук». Але не кожнаму можа быць цікава прагрызацца праз расійскае кіно.
Пачнем з рэсурсу IMDb, што ўзнік у 1990 годзе. Аднаго гэтага партала хопіць, каб наталіць вашу смагу да добрага кіно. На IMDb існуе агромністая база фільмаў, тэлешоу і серыялаў — мільёны праектаў з трэйлерамі, кароткім апісаннем сюжэту, расказам пра акцёраў, вядоўцаў, прадзюсараў, рэжысёраў і іншых, хто прыкладае руку да стварэння кіно і праграм.
Не ведаеце, з чаго пачаць? На IMDb ёсць топы самых папулярных фільмаў на сёння — і па версіі карыстальнікаў рэсурсу, і па выручцы, ёсць і топы тэлешоу. Можна прысвяціць час спісу з 250 найлепшых фільмаў за гісторыю кіно паводле карыстальнікаў IMDb: цяпер там у першай тройцы «Уцёкі з Шаўшэнка», «Хросны бацька» і «Цёмны рыцар». А можна паглядзець, што цяпер папулярна сярод новых стужак — у тройцы «Насферату», «Зноў у справе» і «Бруталіст».
Калі хочацца больш прафесійнага падыходу, можна зайсці на спецыяльныя старонкі, прысвечаныя кінаўзнагародам — ад знакамітых «Оскара» і «Залатога Глобуса» да малавядомых, але аўтарытэтных накшталт узнагароды амерыканскага кінафестываля Sundance. IMDb прапануе навіны з гэтых падзей і, канечне, публікуе пераможцаў, а таксама часам робіць свае падборкі конкурсных фільмаў, на якія варта звярнуць увагу.
Гэтыя падборкі — разыначка IMDb. Напрыклад, цяпер там можна пачытаць пра самыя чаканыя фільмы, серыялы і тэлешоу 2025 года па версіі гледачоў, а таксама азнаёміцца з падборкай найлепшых свежых кіно і серыялаў па версіі супрацоўнікаў выдання.
Каб атрымаць поўны функцыянал IMDb, варта завесці на сайце ўласны акаўнт. У такім выпадку вы зможаце адзначаць на партале прагледжаныя фільмы і складаць спіс тых, якія хацелася б вам пабачыць, а таксама атрымліваць персаналізаваныя рэкамендацыі праектаў, на якія варта звярнуць увагу. Пры жаданні можна будзе пісаць водгукі на праекты і не толькі.
Калі хочацца больш нефармальны падыход да кіно, паспрабуйце рэсурс Rotten Tomatoes. Назва сайта перакладаецца як «гнілыя памідоры», і няцяжка здагадацца, што стваральнікаў рэсурсу натхніла традыцыя закідваць дрэнных артыстаў гнілымі памідорамі.
Фішка Rotten Tomatoes — гэта складаная сістэма рэйтынгаў, якой не адразу дасі рады, але затое з яе дапамогай можна ацаніць праект больш аб'ектыўна. Пакажам, як гэта працуе, на прыкладзе фільма «Канклаў» (Conclave):
Звярніце ўвагу на два рэйтынгі ў працэнтах, што пад цэнтральнай выявай. Першы з іх — таматаметр, ён заснаваны на меркаваннях соцень кінакрытыкаў. Калі ў фільма менш за 60% станоўчых водгукаў, ён лічыцца «гнілым» і атрымлівае адмысловы зялёны значок. Як гэта выглядае, можна пабачыць на прыкладзе стужкі Back in Action у правым ніжнім куце скрына. А калі фільм атрымлівае не менш за 60% станоўчых водгукаў, яго лічаць «свежым» і прысвойваюць яму значок памідора. 75% і больш на таматаметры — прычына ўзнагародзіць стужку статусам Certified Fresh, ці «Сертыфікаваны свежы», як гэта і здарылася з «Канклавам».
Другі рэйтынг — папкорнметр, ён заснаваны на водгуках звычайных тэлегледачоў. Перакуленае зялёнае вядро папкорна — знак, што менш за 60% гледачоў ацанілі стужку або тэлешоу на 3,5 бала ці вышэй. Калі такіх гледачоў не менш за 60%, рэйтынг будзе пазначаны чырвоным вядром з папкорнам.
Акрамя гэтага, на Rotten Tomatoes можна пачытаць водгукі крытыкаў і простых гледачоў на праекты — выданне нават фармулюе агульныя высновы па водгуках і першай, і другой катэгорыі кінааматараў. І, канечне, тут ёсць трэйлеры і навіны пра фільмы і тэлешоу, а таксама інфармацыя пра тых, хто стаіць за праектамі.
Асобна адзначым, што на Rotten Tomatoes ёсць свая кінаўзнагарода пад назвай Rotten Tomatoes Awards. Вось некаторыя з сёлетніх лаўрэатаў — найлепшай стужкай тут лічаць прыбытковую «Дзюна: Частка другая»:
Яшчэ адна крэатыўная падборка на сайце — 100 фільмаў з найгоршым рэйтынгам на Rotten Tomatoes. Часам у кіно спрацоўвае прынцып «так дрэнна, што нават добра», і магчыма, што ў гэтай падборцы вы знойдзеце нешта для сябе.
Цяпер «лідар» рэйтынгу — трылер «Балістыка: Экс супраць Сівер» (2002) з Антоніа Бандэрасам. На другім месцы хорар «Адзін прапушчаны званок» (2008), на трэцім — хрысціянскі апакаліптычны трылер «Пакінутыя» (2014) з Нікаласам Кейджам.
Нарэшце, зазірніце на Metacritic. Гэта не такі буйны рэсурс, як тыя, што мы згадалі вышэй: звярніце ўвагу, калі на «Канклаў» было амаль 300 водгукаў кінакрытыкаў на Rotten Tomatoes, на Metacritic лічаць водгукі ў дзясятках.
Але Metacritic цікавы тым, што тут ёсць дадатковыя катэгорыі кантэнту: акрамя фільмаў і тэлешоу, вам раскажуць пра музыку і камп'ютарныя гульні. Ёсць падборкі найлепшых альбомаў, гульняў, фільмаў і тэлешоу года — карацей, вам амаль не пакідаюць шансаў пайсці без забавы на вечар.
«Наша Нiва» — бастыён беларушчыны
ПАДТРЫМАЦЬЦяпер чытаюць
Справа Софтклуба: затрыманы патрыярх беларускага ІТ Уладзімір Сіротка і некалькі топ-менеджараў. Яны падарылі нам АРІП16
Каментары