1 лютага на Беласточчыне прайшоў KALINOŬSKI MARŠ 2025, прымеркаваны да дня народзінаў Кастуся Каліноўскага і ушанавання памяці герояў Паўстання 1863-64 гадоў, піша «Свабода».
Марш быў праведзены арганізацыяй «Рух», партнэрамі выступілі Беларуская дыяспара Беластоку, клюб гістарычнай рэканструкцыі «Invictus 1863», Беластоцкая Харугва і «Беларускі дом».
Мерапрыемства пачалося ў мястэчку Гарадок, дзе штогод ладзілася «Басовішча», а цяпер «Тутака». Тут ёсьць вуліца Кастуся Каліноўскага. Адтуль удзельнікі выступілі пешым маршам у бок вёскі Страшава.
Пешы марш склаў больш за 5 кілямэтраў. У Страшаве ўдзельнікі ўшанавалі памяць вядомага беларускага пісьменніка і грамадзкага дзеяча Аляксея Карпюка, які нарадзіўся ў гэтай вёсцы, а ў час ІІ Усясьветнай вайны кіраваў партызанскім атрадам імя Кастуся Каліноўскага.
Таксама актывісты ўшанавалі памяць выбітнага беларускага вайсковага і грамадзка-палітычнага дзеяча Міколу Дзямідава, які нарадзіўся ў суседнім Гарадку і быў сваяком Кастуся Каліноўскага. Каля прыдарожнай капліцы ўскладзеныя выявы дзеячоў разам са зьнічамі.
Пасьля ўдзельнікі маршу зладзілі ўжо аўтапрабег да вёскі Мастаўляны — месца, дзе нарадзіўся Кастусь Каліноўскі. Разам зь пешым маршам адлегласьць склала 26 кілямэтраў — менавіта столькі гадоў пражыў нацыянальны герой.
У Мастаўлянах прайшла ўрачыстая частка мерапрыемства. Яе адкрыў Васіль Калач і іншыя прадстаўнікі клюбу Invictus 1863, якія сталі на ганаровай варце каля помніка, апранутыя ў паўстанцкія мундуры. Праграму працягнула Кацярына Ваданосава, якая прачытала ўласны верш, прысьвечаны паўстаньню — «Касінэрскі баль». У Мастаўлянах загучалі запаветы Яські, гаспадара з-пад Вільні — «Лісты з-пад шыбеніцы». Далей Аляксей Трубкін расказаў пра ранейшыя ўшанаваньні памяці герояў паўстаньня і гісторыю ўсталяваньня помніку ў Мастаўлянах.
-
«Калі цяпер херова, значыць, гэта яшчэ не канец». Пагутарылі з эпатажным «святаром XXI стагоддзя», пра якога не было чуваць пяць гадоў пасля арышту
-
«Адну мяне бесіць, што за мяжой я выключна ІрЫна?» Беларуска абураецца транслітэрацыяй у пашпарце з беларускай мовы
-
У Лідзе памёр 71-гадовы мужчына. Яго сын, зборшчык подпісаў за Цапкалу, кажа, што бацьку закатавалі да смерці. Ці так гэта?
Каментары