Беларусам, якія атрымалі грэчаскі шэнген, сталі часта тэлефанаваць з консульства
Увага да беларусаў, якія атрымалі шэнгенскую візу ці хочуць гэта зрабіць, узмацняецца. У снежні супрацоўнікі візавага цэнтра Польшчы абзвоньвалі тых, хто запісаўся на падачу ў мінскай консульскай акрузе. Іх цікавіла, як людзі трапілі ў чаргу. А ў лютым нумар консульства Грэцыі ў Маскве стаў усё часцей высвечвацца на тэлефонах беларусаў, якія атрымалі шэнген гэтай краіны, піша «Люстэрка».
У людзей просяць пацвердзіць бронь у гатэлі. Калі чалавек гэтага не робіць, то наступствы сумныя.
Па словах візавай эксперткі і рэдактаркі visaflow.live Анастасіі Лысакоўскай, людзям, якія атрымлівалі грэчаскі шэнген, і ў мінулыя гады набіралі і пісалі з консульства ў Маскве. Маглі папрасіць пацвердзіць бронь у гатэлі. У лютым гэтых званкоў стала больш.
«Раней гэта была хутчэй рэдкасць, чым заканамернасць. Цяпер званкі паступаюць часта, — кажа экспертка. — Падчас размовы ў чалавека просяць выслаць на электронную пошту чэк аплаты гатэля. Калі ён гэтага не робіць, візу анулююць у аднабаковым парадку. Тое ж адбываецца, калі консульства не змагло звязацца з турыстам».
Анастасія адзначае, што людзям тэлефануюць рандомна. Набіраюць і тым, у каго раней быў грэцкі шэнген, і тым, каму яго ўклеілі ўпершыню. Адзіная заканамернасць, якую яны з калегамі заўважылі: людзі, з кім звязваліся, за некалькі дзён да гэтага адмянялі бронь.
Як консульства пра гэта даведалася, Анастасія не ў курсе. Мяркуе, што яны маглі ўдакладніць у гатэля ці праверыць рэзервацыю на сайце: падаючыся на візу, чалавек пазначае, дзе плануе спыніцца.
«Пра тое, што віза ануляваная, чалавека загадзя могуць не папярэдзіць. Гэта тычыцца выпадкаў, калі да яго не датэлефанаваліся, — кажа Анастасія. — Ад калегаў ведаю, што некаторым іх кліентам, якія адказалі на званок, але не пацвердзілі бронь, прыходзіў ліст з паведамленнем: «консульства адпраўляе запыт на ануляванне». Я так разумею, гэта нейкі ўнутраны працэс, вынік якога — адмена шэнгена. Аднак афіцыйна пра вынік можна даведацца, толькі калі ім ператэлефануеш ці ўжо на мяжы».
Чула суразмоўца і пра выпадкі, калі чалавек адмовіўся ад броні. Праз нейкі час яму патэлефанавалі з консульства, ён не зняў трубку, хутка аформіў новую рэгістрацыю ў гатэлі, набраў консульства, даў справаздачу, але яму ўсё роўна сказалі, што «адправілі запыт на ануляванне».
«І ўсё, трэба падавацца зноўку», — адзначае экспертка.
Права анулявання шэнгена прапісана ў артыкуле 34 Візавага кодэкса ЕС. Сярод іншага ў ім гаворыцца: «Віза можа быць скасаваная ў тым выпадку, калі выяўлена, што ўмовы выдачы перасталі выконвацца». Сюды можна аднесці і адмену броні.
«У нас няма дакладнага адказу, чаму людзям сталі часцей тэлефанаваць, — кажа Анастасія. — Наколькі я ведаю, з'явіўся новы консул. Магчыма, у гэтым прычына».
У снежні пра званкі з візавага цэнтра расказвалі беларусы, якія запісаліся на польскі шэнген. Гаворка ішла пра тых, хто належыць да мінскай консульскай акругі. Іх набіралі з пытаннем, як яны трапілі ў чаргу на падачу, і прасілі назваць код, які чалавеку тут жа адпраўлялі на электронную пошту. Калі ён не мог гэтага зрабіць, рэгістрацыю анулявалі. Эксперты меркавалі, што так змагаліся з візавымі пасярэднікамі.
Мінчукі атрымалі балгарскую шэнгенскую візу, але за дзень да паездкі яе анулявалі
Беларусы могуць застацца без шэнгена, нават калі яго атрымалі. З'явілася новая тэндэнцыя анулявання віз
Як атрымаць шэнгенскую візу ў Беларусі самастойна. Практыка і парады
«Бессэнсоўна падаваць апеляцыю». Як беларусам адмаўляюць у польскіх візах і што яны з гэтым робяць
Спецпрадстаўнік МЗС Польшчы па Беларусі не лічыць працэс атрымання польскіх візаў складаным і дарагім
Цяпер чытаюць
«Ганна адказала: «Так!» Віталь Гуркоў зрабіў прапанову рукі і сэрца. Хто ж нявеста?26
Каментары