Беларусу выставілі абвінавачанне ў падпале гіпермаркета ў Варшаве па заданні расійскіх спецслужбаў
Польская нацыянальная пракуратура прад’явіла абвінавачанне грамадзяніну Беларусі Сцяпану К. у падпале шматпавярховай будаўнічай крамы ў Варшаве ў красавіку 2024 года. Мужчына дзейнічаў па заданні расійскай разведкі, піша Reform.news.
Як паведамілі ў пракуратуры, пажар адбыўся 14 красавіка 2024 года, згарэла частка крамы, шкода ацэньваецца ў суму больш за 3,5 мільёна злотых (прыблізна 900 тысяч даляраў па бягучым курсе). Гаворка ідзе пра пажар у ГЦ OBI на вуліцы Радзымінскай.
Паводле версіі абвінавачання, грамадзянін Беларусі 13 красавіка разліў у краме лёгкаўзгаральную вадкасць і пакінуў прыстасаванні для дыстанцыйнага падпалу. Уначы на 14 красавіка яны спрацавалі, і пачаўся пажар. Таксама Сцяпан К. здымаў пажар на тэлефон, а пазней частка гэтых матэрыялаў «была апублікаваная на расійскіх прапагандысцкіх сайтах».
«Акрамя таго, устаноўлена, што падазраваны Сцяпан К. здзейсніў названы падпал, дзейнічаючы ў інтарэсах замежнай разведкі, а менавіта разведкі Расійскай Федэрацыі, і па заданні расійскіх спецслужбаў», — дадалі ў пракуратуры.
Мужчыну прад’яўлены абвінавачанні ў здзяйсненні дыверсіі ў інтарэсах замежнай разведкі і тэрарыстычным злачынстве (арт. 130 і п. 1 арт. 165 Крымінальнага кодэкса Польшчы). Паводле гэтых артыкулаў прадугледжана пакаранне тэрмінам ад 10 гадоў да пажыццёвага зняволення.
«Пасля выстаўлення абвінавачання Сцяпану К. яго дапыталі ў якасці падазраванага. На гэты момант мы не даем ніякай інфармацыі пра яго працэсуальны статус», — гаворыцца ў паведамленні.
Суд вырашыў пакінуць яго пад арыштам яшчэ на тры месяцы. Ён ужо знаходзіцца пад вартай. У пракуратуры патлумачылі, што мужчына з’яўляецца фігурантам расследавання ў справе арганізаванай злачыннай групы, якая займаецца вярбоўкай і арганізацыяй дыверсійнай дзейнасці ў інтарэсах замежнай разведкі. Яму таксама прад’яўлены абвінавачанні па гэтай справе паводле артыкулаў аб шпіянажы і ўдзеле ў арганізаванай злачыннай групе.
Пракуратура дадала, што працягваецца расследаванне падпалаў іншых буйных крам у Польшчы і краінах Цэнтральнай і Усходняй Еўропы, уключаючы Літву. Следства вядзецца, у тым ліку, у рамках сумеснай следчай групы з літоўскімі праваахоўнымі органамі.
У мінулым годзе польскія праваахоўныя органы неаднаразова заяўлялі пра затрыманне асоб, датычных да працы на расійскую разведку, а таксама да буйных пажараў, якія адбыліся ў Варшаве, Уроцлаве, Гданьску і іншых месцах. У прыватнасці, у маі мінулага года Агенцтва ўнутранай бяспекі (ABW) паведамляла пра правядзенне следчых дзеянняў, звязаных з пажарамі. Паводле звестак СМІ, гаворка тады магла ісці пра грамадзян Беларусі.
Трэба адзначыць, што ў сённяшніх паведамленнях паліцыі і пракуратуры не ўдакладняецца, калі, дзе і пры якіх абставінах быў затрыманы Сцяпан К.
Каментары
ну зараз трэба літоўскім паліціянтам дапамагчы са злоснымі графіцістамі
Пры чым гэта не першы раз такое.