У Парыжы пачаўся суд над «дзядамі-грабежнікамі», якія амаль дзесяцігоддзе таму абрабавалі Кім Кардаш'ян
Зорку рэаліці-шоу Кім Кардаш'ян абрабавалі ноччу 3 кастрычніка 2016 года ў парыжскім гатэлі Hôtel de Pourtalès, дзе злачынцы, пераапранутыя ў паліцэйскіх, звязалі яе і забралі каштоўнасці на суму каля 10 мільёнаў долараў, уключаючы заручальнае кальцо ад Канье Уэста, нагадвае Бі-бі-сі.
Абвінавачаных у прэсе празвалі «дзядамі-грабежнікамі», бо большасці з іх ужо за 60 гадоў. Агулам па справе праходзіць 12 чалавек, але адзін памёр, а іншага могуць вызваліць ад удзелу ў працэсе праз дэменцыю. Пяцёра абвінавачваюцца ў самім рабаванні, астатнія — у саўдзеле.
Асноўны абвінавачаны — 68-гадовы Аамар Аіт Кедаш, вядомы як «Стары Амар». Ягонае ДНК знайшлі на месцы злачынства. Кедаш прызнаў, што звязваў Кардаш'ян, але сцвярджае, што не быў арганізатарам, а дзейнічаў па інструкцыях «інфарматара», блізкага да зоркі.
Яшчэ адзін абвінавачаны — 71-гадовы Юніс Абас, які падчас рабавання дзяжурыў у фае. Пазней ён напісаў кнігу пра злачынства і прызнаўся, што планаваў зрабіць гэта сваёй «апошняй справай» перад выхадам на пенсію. Толькі Кедаш і Абас прызналі віну, астатнія яе адмаўляюць.
Паліцыя выявіла, што злачынцы атрымлівалі інфармацыю пра Кардаш'ян праз сацсеткі і, магчыма, ад знаёмых яе кіроўцы. Само рабаванне было не вельмі прафесійным: злачынцы ўцякалі пешшу і на раварах, адна з сумак з ювелірнымі вырабамі ўпала і з яе выпала калье з брыльянтамі, якое адно толькі і вярнулі гаспадыні. Большасць жа ўпрыгожанняў былі пераплаўленыя і прададзеныя.
Кім Кардаш'ян будзе сведчыць у судзе 13 мая. Пасля таго здарэння яна казала, што перажыла моцны страх і перагледзела сваё стаўленне да багацця і публічнасці.
Каментары