У Мінску адмянілі танкавы фестываль ад Lesta на 9 Мая. А абяцалі «мегападзею»
У сакавіку ўладальнік «Леста ігры» анансаваў вялікі ўдзел кампаніі ў мінскіх урачыстасцях да 80-годдзя Перамогі ў Вялікай Айчыннай вайне. Але ён адменены, піша Devby.io. Гэта здарылася пасля абвяшчэння «Лесты» экстрэмісцкай у Расіі.
У інтэрв’ю каналу АНТ, якое выйшла ў канцы сакавіка, кіраўнік кампаніі «Леста ігры» Малік Хатажаеў анансаваў «мегападзею», якая рыхтуецца ў Мінску да 80-годдзя Перамогі. І запрасіў усіх на Нямігу 10 мая.
— Мы плануем мегападзею, — сказаў Хатажаеў. — Зараз, напэўна, рана пра яе гаварыць, хутка ўсё прагучыць. <…> 10 мая на Нямізе будзе вялікае гарадское свята, прысвечанае 80-годдзю. Там будзе кіберспорт, выступ артыстаў. Мы ў ім бяром удзел. Гэта будзе вялікая гарадская падзея. Прыходзьце — будзе крута.
Ён таксама падкрэсліў, што падрыхтоўка да юбілею ідзе ўжо год, і кампанія выкладваецца «на поўную», будзе «куча ўсяго», у тым ліку «шыкарны парад».
У канцы красавіка з’явіліся падрабязнасці пра ўдзел «Лесты» ў гарадскім сямейным фестывалі «Наша перамога» 10 мая. Сайт WOT Express (навіны «Свету танкаў» і World of Tanks) апублікаваў буклет з абазначэннем зон актыўнасцяў «Лесты» каля Палаца спорту. Сярод іх — сіламер, баскетбол, цір, хулахуп, паласа перашкод. А яшчэ — мерч «Свету танкаў», зона выдачы ўзнагарод, зона Q&A. Зараз публікацыя суправаджаецца абнаўленнем: «Танкавы фестываль адмяняецца».
Галоўнай падзеяй танкавага фестывалю (а ўдзел «Лесты» сайт назваў менавіта так) быў запланаваны фінал «Кубка Беларусі» — кіберспартыўнага турніру з прызавым фондам 50 тысяч BYN, які пачаўся анлайн яшчэ 14 красавіка. Зараз на афіцыйным сайце гульні World of Tanks, на старонцы «Кубка Беларусі» стаіць такая плашка.
Пры гэтым, хто цяпер арганізатар — незразумела.
А на старонцы «Свету танкаў» у VK на пачатку мая з’явілася аб’ява пра перанос фіналу «Кубка Беларусі» «на больш позні перыяд па тэхнічных прычынах». І нават пра адмену сямейнага фестывалю.
Між тым, сямейны фестываль усё ж адбудзецца. Ён ёсць у праграме Мінгарвыканкама, праўда ў анонсе нічога не гаворыцца пра «Свет танкаў»:
«У суботу, 10 мая, з 12 да 23 гадзін на пляцоўцы каля Палаца спорту на праспекце Пераможцаў адбудзецца сямейнае свята «Наша Перамога». Тут пройдуць канцэрты, будзе працаваць палявая кухня. Мінабароны падрыхтавала выставу сучаснай ваеннай тэхнікі».
А вось як піша пра фестываль «Камсамольская праўда»:
«10 мая на пляцоўцы каля Палаца Спорту з 12.00 да 23.00 адбудзецца сямейны фестываль «Наша перамога». Будуць працаваць фудкорты. Акрамя таго, размесціцца і вялікі кірмаш падарункаў ручной работы «Гарошак-маркет». Гасцям фестывалю прапануюць шмат актыўнасцяў. Таксама будуць працаваць лакацыі хакейнага клуба «Дынама-Мінск», разнастайныя выставы і многае іншае. А 15.00 пачнецца маштабны канцэрт, у якім прымуць удзел папулярныя беларускія і расійскія артысты. Хэдлайнерам свята стане спявак Niletto».
Чытач devby, знаёмы з арганізацыяй танкавага свята, напісаў, што ўсе мерапрыемствы з удзелам «Лесты» былі адменены па рашэнні дзяржаўнага заказчыка «пасля навін з РФ».
Нагадаем, у канцы красавіка Генпракуратура Расіі папрасіла суд забараніць дзейнасць у краіне «экстрэмісцкага аб’яднання», якое, паводле версіі ведамства, складаецца з уладальніка расійскай кампаніі «Леста Игры» Маліка Хатажаева і ўладальніка Wargaming.net Віктара Кіслага. Ведамства таксама запатрабавала канфіскаваць на карысць дзяржавы 100% доляў у статутным капітале «Леста Игры», а менавіта трох яе ТАА: «Леста», «Леста Геймс Эджэнсі» і «Леста Геймс Масква». Трошкі раней стала вядома, што на актывы юрыдычных асоб накладзены арышт. Падобна, расійскую кампанію падазраюць у сувязі з Wargaming і дапамозе УСУ.
Цяпер чытаюць
Беларуска за свой кошт арганізавала свята ў роднай вёсцы, якая амаль вымерла. Прыехалі аднавяскоўцы нават з Еўрасаюза8
Каментары
И тут интересно, министру приказали или забашляли накануне ареста активов?