Раней той жа святар зрабіў аналагічны «еўрарамонт» на Княгінінскай царкве — ён быў прызнаны незаконным.
Радыкальныя змены ў выглядзе сціплай могілкавай капліцы ў Выгалавічах Мядзельскага раёна заўважыў тэлеграм-канал «Naračanščyna | Нарачанскі край»
Драўляная капліца на мясцовых могілках, відаць, была пабудаваная ў пачатку XX стагоддзя і захоўвала свой аўтэнтычны аскетычны, але атмасферны выгляд аж да мінулага года.
З гадамі ў капліцы прасеў падмурак, згнілі ніжнія вянцы і пачала працякаць страха, таму ў 2024 годзе настаяцель Княгінінскай царквы прапанаваў адрамантаваць капліцу, з чым вяскоўцы пагадзіліся.
У выніку на храме, які арганічна ўпісвалася ў асяроддзе, святар правёў такі «еўрарамонт», што ён стаў выглядаць досыць танна і чужародна для месца памяці.
Сцены былі ашаляваныя круглявым сайдынгам пад дрэва, знішчаны прычолак, фасад стаў абсалютна плоскім, у вокнах з'явіліся шклопакеты, дах накрыты сінім металапрофілем, а пасярэдзіне ягонага каньку пастаўлена залатая глаўка-цыбуліна.
За адно на могілках спілавалі апошнія дрэвы.
Да 2020 года той жа святар ашаляваў драўляным сайдынгам Свята-Троіцкую царкву ў Княгініне і ўставіў замест драўляных вокнаў шклопакеты. Міністэрства культуры палічыла, што гэтыя работы, праведзеныя на гісторыка-культурнай каштоўнасці, з'яўляюцца незаконнымі.
«Наша Нiва» — бастыён беларушчыны
ПАДТРЫМАЦЬ
Памятаеце кадэта, які на сустрэчы з Лукашэнкам смела выступіў па-беларуску? Ён выехаў з краіны21
Каментары
*ў пачатку XX стагоддзя - НА пачатку
*ашаляваныя - аБшаляваныя
*прычолак - ФРАНТОН , ніякіх "прычваркаў" няма НІДЗЕ, акрамя НН
*ягонага каньку - яго каньку ("ягоны" - гэта неафіта-занадта-беларускае)
*глаўка-цыбуліна - купалок/галоўка. "глаўка" - гэта маленькая глава(раздзел) ў кнізе
*замест драўляны вокнаў - драўляныХ
Пасярэдзіне канька, альбо пасярэдзіне вільчыка. Канчатак -а.
Ягонага і яго прыбраць, і так зразумела што такое і дзе ёсць той канёк альбо вільчык. А то атрымліваецца як "сцяна і ейныя вокны", "ганак і ягоныя (яго) прыступкі".
Ягоны - звычайная норма, нічога неафітнага тут няма.
У расійскай мове "его", а "евоный" размоўная форма, жарганізм, непісьменнасць.
У беларускай мове якраз "ягоны".
Каго? Яго.
Чый? Ягоны.
"Купалок" тут не надта пасуе, бо мае канатацыі свайго, каштоўнага.
Тут размова пра недарэчнасць, пра чужароднае таму лепш ўжо звыклае "цыбуліна".