«Мяне калаціла, цяклі слёзы». Самалёт «Белавія», які ляцеў з Брэста ў Анталью, прыйшлося развярнуць над Расіяй
У панядзелак, 12 мая, «Белавія» пачала сезон палётаў у турэцкую Анталью з Брэста. Але пасажырам прыйшлося пахвалявацца — пасярод дарогі, калі паветранае судна пралятала над Расіяй, яго развярнулі назад. Пра гэта ў інстаграме расказала блогерка Крысціна Абубакірава, піша «Люстэрка».
Як піша Крысціна ў сторыс, самалёт памяняў курс прыкладна за тры гадзіны да прызямлення ў Турцыі:
«Пілот у мікрафон кажа: наш самалёт разварочваецца з тэхнічных прычын і ляціць у Мінск. Праз дзве гадзіны будзем у Мінску».
Ніякай дадатковай інфармацыі пасажырам не далі. Па словах блогеркі, «спалохаліся ўсе». А тыя, хто часта лётае, казалі, што «такое ўпершыню».
«І як бы я ні спрабавала сябе супакоіць, мяне калаціла, цяклі слёзы, — распавядала Крысціна. — У думках ужо развітвалася са сваёй сям'ёй. Гэта страшна, у галаве нават усплывала карцінка могілак. Але я рэальна старалася трымаць сябе ў руках і кантраляваць свае думкі. Проста сітуацыя — п**дзец».
У Турцыю беларуска ляцела разам з двума дзецьмі і мужам. Прызнаецца, што супакоілася пасля таго, як узяла малодшае дзіця на рукі. Дапамог і муж, які «не разводзіць панікі».
Па словах Крысціны, калі яна звярнулася з пытаннямі да сцюардэсы, тая запэўніла, што перажываць няма з-за чаго і што «калі б было нешта страшнае, вы б пра гэта ведалі, і мы б з вамі ўжо рыхтаваліся».
У выніку да таго часу, як самалёт павінен быў сесці ў Антальі (гэта значыць каля 20.00), ён прызямліўся ў Мінску. Усё прайшло добра, тлумачыць жанчына, але адзначае, што пры пасадцы моцна заклала вушы — не «як звычайна».
Праз паўтары гадзіны пасажыраў пакармілі, а новы самалёт далі да гадзіны ночы. Праблем з чаканнем не ўзнікла: малодшае дзіця заснула, старэйшая дачка гуляла з іншымі дзецьмі.
«Але калі я даведалася прычыну, праз якую нас вярнулі, я а**ела, не тое слова, — працягвае расказ Крысціна. — У нашым самалёце трэснула лабавое шкло, там, дзе сядзіць пілот. Вы проста ўявіце, сітуацыя 50/50, яно ж магло ўзарвацца!»
Праўда, у прамым сэнсе ўзарвацца шкло не можа, але глыбокія расколіны ў ім сапраўды могуць спрычыніцца да разгерметызацыі судна. Праўда, часцей за ўсё трэскаецца адзін з пластоў шкла, падобныя выпадкі ўжо адбываліся з беларускімі самалётамі.
Напрыклад, у лістападзе 2022 года трэснула шкло самалёта Boeing 737-800, які ляцеў з Мінска ў Шарджу (горад у Аб'яднаных Арабскіх Эміратах). Тады «Белавія» заяўляла, што расколіны «ўзнікаюць выпадковым чынам і не могуць быць спрагназаваныя авіякампаніяй», а прычына звычайна ў «стомленаснай напрузе» шкла.
«Растрэскванне покрыўнага пласта лабавога шкла кабіны пілотаў без пашкоджання сілавых элементаў не ўплывае на бяспеку палёту», — паведамляла тады кампанія.
Што кажуць у «Белавія»?
Каб даведацца дэталі, журналістка «Люстэрка» патэлефанавала ў даведачную «Белавія». Там сітуацыю пракаментаваць не змаглі. Са слоў супрацоўніцы, у яе ёсць інфармацыя толькі за сённяшні дзень.
У прыёмнай гендырэктара кампаніі таксама расказалі, што пра падобнае не чулі. Пры гэтым пра растрэскванне лабавога шкла самалёта «Белавія», які ляцеў 12 мая з Брэста ў Анталью, паведаміў тэлеграм-канал Aviaincident.
Інфармацыю пра гэта аўтары канала, па ўсёй бачнасці, атрымалі ад прадстаўнікоў Растоўскай зоны адзінай сістэмы арганізацыі паветранага руху Расіі (ЕС ОрВД). Там, у сваю чаргу, даведаліся пра здарэнне па пошце ад дыспетчара з цэнтра планавання і каардынавання Растоўскага занальнага цэнтра.
Згодна з гэтай інфармацыяй, 12 мая ў 16.48 борт «Белавія» далажыў аб расколіне на лабавым шкле з унутранага боку ў другога пілота і запытаў зніжэнне. У выніку судна вярнулася ў Беларусь і прызямлілася ў Мінску.
Каментары