Жанчына, якая выйграла ў латарэю і ўсё спусціла, замовіла забойства мужа
Жыхарка Германіі пяць гадоў таму сарвала джэкпот у латарэі, выйграўшы больш за мільён еўра. Калі грошы скончыліся, яна вырашыла завалодаць маёмасцю мужа, наняўшы для гэтага кілера.
Як паведамляе Süddeutsche Zeitung, на мінулым тыдні ў адным з судоў Мюнхена пачалі разгляд справы супраць 58-гадовай Патрыцыі С. і яе 29-гадовай дачкі Сіндзі В. па абвінавачванню ў замаху на заказное забойства. Разам з імі на лаве падсудных знаходзяцца хлопец дачкі Мікалай Б. і непасрэдны выканаўца — 33-гадовы грамадзянін Балгарыі Радзі С.
Згодна з матэрыяламі справы, у 2018 годзе хатняя гаспадыня з прэстыжнага прыгарада Мюнхена Патрыцыя выйграла ў латарэю 1,2 мільёна еўра. Яна стала зваць сябе «графіняй фон С.» і пачала траціць грошы направа і налева.
Да 2023 года, усяго праз пяць гадоў, ад выйгрышу нічога не засталося.
Імкнучыся захаваць папярэдні ўзровень жыцця, Патрыцыя і яе дачка ад першага шлюбу заняліся інтэрнэт-махлярствам. Адным з эпізодаў, зафіксаваным следчымі, стаў продаж падробленай сумкі Dior на eBay за 3500 еўра. Удзельнік таргоў, які нібыта набыў Apple Watch Series 8 за 420 еўра замест гадзінніка ў пасылцы атрымаў «змяты кавалак паперы і папяровы ручнік».
Паведамляецца, што Патрыцыя і Сіндзі зарабілі дзясяткі тысяч еўра на меркаваным махлярстве. Аднак, відаць, гэтага было недастаткова. Па версіі следства, Патрыцыя вырашыла пазбавіцца ад мужа, ад якога і так хацела сысці, арганізаваўшы яго забойства.
Але выканаць «заказ» павінен быў іншы чалавек. Паводле абвінавачання, жанчыны ўгаварылі сужыцеля дачкі — Мікалая Б. — звязацца з адным з яго знаёмых з Балгарыі Радзі С.
Як сцвярджае следства, Радзі працаваў у сферы фінансаў і быў вядомы тым, што для выбівання даўгоў не цураўся гвалту.
Мікалай і Сіндзі адправіліся ў Балгарыю з 20 тысячамі еўра ў якасці задатку. Кілеру абяцалі 50 тысяч еўра за выкананую працу.
Следства сцвярджае, што ў дзень забойства Мікалай Б. падвёз Радзі да дома Патрыцыі і яе мужа. Калі яны прыехалі, Патрыцыя ўжо чакала балгарына і паказала яму, дзе яна схавала сякеру, якой ён павінен быў забіць яе мужа.
Жанчына таксама нібыта паказала Радзі, дзе яму трэба схавацца. У гэтым месцы на тэрыторыі ўчастка быў усталяваны датчык руху. Аднак Патрыцыя за некалькі дзён да планаванага забойства ўгаварыла мужа дэактываваць прыладу.
27 лютага 2024 года каля 21.50 55-гадовы муж выйшаў з дома прайсціся. Мужчына толькі паспеў зачыніць дзверы дома, як кілер напаў на яго. Паводле абвінавачання, ён тройчы ўдарыў ахвяру сякерай па галаве і нанёс удар нажом. Аднак гаспадару ўдалося выжыць, нягледзячы на цяжкія траўмы галавы. Момант нападу заўважыў сусед.
Адметна, што сама Патрыцыя пазваніла ў паліцыю і паведаміла аб нападзе. Мужа верталётам даставілі ў бальніцу.
Паліцыя распачала расследаванне і ў хуткім часе аказалася, што злачынцы «часткова ўваходзяць у асабістае асяроддзе ахвяры».
На працэсе Патрыцыя і трое яе саўдзельнікаў захоўваюць маўчанне. Неўзабаве мусіць даць паказанні яе ўжо былы муж, а прысуд чакаецца ў пачатку ліпеня. Былой латарэйнай мільянерцы пагражае пажыццёвае зняволенне.
Каментары
[Зрэдагавана]