Тату-мастаку з Гомеля, што жыве ў Польшчы, патрэбна дапамога. Некалькі месяцаў таму яму перасадзілі сэрца
Гомельскі тату-мастак Ілля, які зараз жыве ў Польшчы, звярнуўся па дапамогу. Паўтара года творца праляжаў у шпіталі, змагаючыся за сваё жыццё. Сёлета хлопцу перасадзілі новае сэрца. «Беларусь для мяне закрытая, а ў Польшчы я за гэты час стаў чалавекам без статусу і амаль бяздомным».
На дадзены момант BYSOL адкрыў збор, каб дапамагчы хлопцу.
«Мяне клічуць Ілля, я тату-мастак з Гомеля. З дзяцінства мне было важна ствараць прыгажосць і пакідаць людзям добрую памяць пра сябе. Калі пачаліся пратэсты 2020 года, я ўжо жыў у Польшчы, але не змог застацца абыякавым: рабіў плакаты, друкаваў футболкі з нашым (бел-чырвона-белым) сцягам, дапамагаў арганізоўваць мітынгі ў Катавіцах. Мы верылі, што голас кожнага мае важнасць».
У 2021 годзе тату-майстру паставілі кардыёстымулятар. Праз год прыбор выйшаў са строю, і клапан разбурыўся. Лекары сказалі, што шанец адзін — перасадка сэрца. Паўтара года Ілля ляжаў у лякарнях, губляючы працу, жыллё і дакументы.
«У сакавіку 2025 года мне перасадзілі новае сэрца. Аперацыя падарыла новае жыццё, але забрала апошнія зберажэнні: хостэл аплачаны быў толькі да 26 чэрвеня, пашпарт і дазвол на жыхарства скончыліся, а дактары пакуль забараняюць любую працу і нават паездкі па горадзе — любое заражэнне можа каштаваць мне новага сэрца. Я павінен прымаць лекі па гадзінах і не ўпускаць нічога, павінен выконваць дыету, акрамя гэтага кожны тыдзень я павінен ездзіць у клініку на кантроль і здаваць аналізы.
У найбліжэйшы час я павінен разабрацца са сваімі дакументамі, каб пазней аформіць інваліднасць і атрымліваць сацыяльную дапамогу.
У мяне няма сям'і і «сваіх» у Польшчы. Сябры падтрымлівалі, як маглі, але іх рэсурсы ўжо скончыліся. А мне ўсё яшчэ патрэбна дапамога, каб далячыцца і не застацца на вуліцы. Я вельмі хачу вярнуцца да творчасці, якой жыў усё жыццё, і працягваць рабіць людзям добрае і прыгожае.
Дзякуй кожнаму, хто адгукнецца: сваім удзелам вы падаўжаеце жыццё адразу двум людзям, якія жывуць зараз ува мне».
Цяпер чытаюць
Лукашэнка даручыў Кубракову разабрацца з тымі, хто п’е каву на АЗС, і навесці там «жалезны парадак»19
Каментары