«Не звязана з вайсковымі вучэннямі». Мінтранс Літвы пракаментаваў скасаванне рэйсаў з Беларусі
Кіраўніца аддзела камунікацыяў Міністэрства транспарту Літвы Аста Дудурыце адказала на пытанне карэспандэнта тэлеканала «Белсат» адносна прычын скасавання рэйсаў паміж Мінскам і Вільняй.
Аста Дудурыце адзначыла, што ў сувязі з пастановай урада Літвы аб надзвычайным становішчы міжнародныя аўтобусныя маршруты абмежаваныя да 29. На кожным маршруце дазволены толькі адзін рэйс у кожны бок на адным аўтобусе.
«Гэтая мера ўстанаўлівае новае патрабаванне: раней дазволы давалі магчымасць выконваць больш рэйсаў і былі сапраўдныя да заканчэння іх тэрміну. З моманту набыцця пастановай моцы Адміністрацыя транспартнай бяспекі Літвы (далей — LTSA) выдала дазволы двум новым маршрутам паводле новых правілаў. Змены ў іншых маршрутах не былі ўнесеныя», — адзначыла Дудурыце.
Яна паведаміла, што ўся інфармацыя пра маршруты і тэрміны дзеяння дазволаў публікуецца на сайце LTSA і даводзіцца да пунктаў памежнага кантролю, якія дапамагаюць забяспечваць выкананне правілаў. Цяпер дзейнічае 29 актыўных маршрутаў, па якіх у цэлым робіцца 31 рэйс у адзін бок. На памежным пункце «Меднікі» за суткі перасякаюць мяжу 44 аўтобусы — па 22 у кожны бок. На пункце «Салечнікі» за суткі перасякаюць мяжу 18 аўтобусаў — па 9 у кожны бок.
«LTSA адзначыла, што перасякае мяжу больш аўтобусаў, чым дазволена, і перавозчыкі былі папярэджаныя пра неабходнасць выконваць патрабаванні сваіх дазволаў. Гэтае папярэджанне, падобна, было эфектыўным, бо колькасць аўтобусаў знізілася да дапушчальнага ўзроўню», — паведаміла прадстаўніца Мінтрансу Літвы.
Пры гэтым яна падкрэсліла, што гэтыя меры ніякім чынам не звязаныя з вайсковымі вучэннямі Расеі і Беларусі «Захад-2025» або з вайсковымі вучэннямі ў Літве.
З 12 жніўня пасажырскі перавозчык Eurolines адмяніў некаторыя рэйсы з Вільні ў Мінск і назад. Пра часовае скасаванне рэйсаў у Вільню з 14 жніўня паведаміў і «Мінсктранс».
Eurolines заявіў, што прычынай сталі вайсковыя вучэнні ў Літве Aršus Vilkas 2025, якія праходзяць каля беларускай мяжы з 11 да 20 жніўня. У «Мінсктрансе» карэспандэнту «Белсата» паведамілі, што рэйсы скасаваныя «ў сувязі з заканчэннем дзеяння дазвольных дакументаў».
Каментары