«Абутак для сапраўдных патрыётаў»: беларуская фабрыка робіць для школьнікаў боты з чырвона-зялёнымі шнуркамі
Кажуць, такі абутак ідэальна пасуе для вучняў вайскова-патрыятычных класаў. А выпускае яго фабрыка, якая шые боты для вайскоўцаў і спецслужбаў.
Перад пачаткам навучальнага года беларуская фабрыка «Чаўляр» актыўна рэкламуе сваю навінку — «патрыятычныя» боты. Сцвярджаецца, што распрацавана калекцыя была спецыяльна для вучняў вайскова-патрыятычных класаў і клубаў. Але ж у інстаграме вытворца хваліцца, што падыдзе такі абутак пад любы стыль і насіць яго можа любы школьнік.
Галоўная асаблівасць ботаў — чырвона-зялёныя шнуркі ды ўшытыя дзе-нідзе мініяцюрныя сцяжкі. Рэкламуюць іх з максімальным пафасам: «Мадэлі для тых, хто не чакае, а робіць. Хто шануе дысцыпліну і ідзе да мэты — крок за крокам».
Дызайнерка, якая працавала над такім спецыфічным абуткам, — Алена Собаль. Яна кажа, ідэя стварыць калекцыю з’явілася ў яе падчас тэматычнай выставы.
— Да нас на стэнд падыходзілі дзеці з вайскова-патрыятычных класаў, клубаў. Яны былі ў форме, але ў красоўках. Для мяне як дызайнеркі гэта нейкі стылістычны правал, рэжа вока. Я зразумела, што наша прадпрыемства ўжо 29 гадоў выпускае абутак для вайскоўцаў, спецслужбаў, для турызму, вандровак — і мы можам зрабіць такі абутак для дзяцей. Было відавочна, што гэтым дзецям замест красовак трэба нармальны абутак, які адпавядае стылю.
Дызайнерка сцвярджае, што фабрыка выкарыстоўвае выключна натуральную скуру і сертыфікаваныя матэрыялы.
— Падэшва зносаўстойлівая, марозаўстойлівая. Дзіцяці будзе зручна і на парадах, і на трэніроўках, і ў нейкіх экстрэмальных умовах.
Пакуль у фірмовай краме прадстаўлена ўсяго 5-6 мадэляў, але абяцаюць, што з'явяцца яшчэ варыянты. Назвы ботаў уражваюць: «Вайпер», «Кобра», «Мангуст». Ёсць нават «АМАП».
Каштуе «патрыятычны» абутак не сказаць, каб вельмі танна — недзе ад 140 да 180 рублёў.
БелАЗ прадае кітайскі варыянт легендарных ботаў Timberland. Яны ў некалькі разоў таннейшыя за арыгінальныя!
Колькі ў Беларусі каштуюць табі — модны абутак, які шмат у каго асацыюецца з капытамі
«Ператвараю смецце ў грошы»: дзяўчына купляе ў сэкандах вопратку за капейкі, а потым робіць з яе дызайнерскія ўборы
«Мае аксэсуары прыносяць поспех, упэўненасць у сабе і грошы». Спявачка Галіна Шышкова стала дызайнеркай
Каментары