Трамп: Вайна Расіі і Украіны — асабісты канфлікт, а Пуцін не сустракаецца з Зяленскім, бо яго не любіць
Адказваючы на пытанні журналістаў адчас прэс-канферэнцыі 25 жніўня, прэзідэнт ЗША Дональд Трамп крануўся пытання вайны ва Украіне і выказаў надзею, што яе ўдасца спыніць, хоць гэта рабіць і цяжка з-за кепскіх асабістых адносін паміж прэзідэнтамі Расіі і Украіны.
Прэзідэнт ЗША Дональд Трамп падчас прэс-канферэнцыі заявіў, што вайна ва Украіне мае характар «асабістага канфлікту».
«Расія і Украіна — гэта аказалася нейкім вялікім асабістым канфліктам, гэта адна з такіх рэчаў. Але мы спынім гэта ў рэшце рэшт, мы спынім гэта таксама».
Адказваючы пазней на пытанне журналіста, чаму Уладзімір Пуцін не хоча сустрэчы з Уладзімірам Зяленскім, Трамп сказаў, што прычына ў тым, што Пуціну проста не падабаецца Зяленскі:
«Таму што ён яго не любіць. Ён яго не любіць. Яму ён не падабаецца. У мяне ёсць людзі, якія мне не падабаюцца. Мне не падабаецца сустракацца з імі. Дык як жа іх прымусіць сустрэцца? Яны насамрэч не любяць адзін аднаго».
Ён таксама адзначыў, што пакуль не абмяркоўваў з Украінай канкрэтныя гарантыі бяспекі, але ЗША гатовыя аказваць падтрымку Кіеву. Пры гэтым Трамп падкрэсліў, што Злучаныя Штаты «больш не выдаткоўваюць грошы на Украіну», а ўсе пытанні закупкі ўзбраенняў ідуць праз НАТА.
Пра свае перамовы з Пуціным Трамп сказаў:
«Так, я размаўляў з ім. Кожная размова праходзіць добра, але потым, на жаль, падае бомба на Кіеў ці ў іншае месца — і гэта мяне вельмі злуе».
Прэзідэнт ЗША таксама расказаў, што абмяркоўваў з Пуціным абмежаванні ядзернай зброі.
«Ракеты, ядзерная зброя — мы гаворым пра шматлікія, розныя рэчы. Мы гаворым пра абмежаванне ядзернай зброі, мы прыцягнем да гэтага Кітай. У нас яе больш за ўсё, у Расіі — другое месца, а ў Кітая — трэцяе, але Кітай значна адстае, хоць праз пяць гадоў ён нас дагоніць», — мяркуе Трамп.
Таксама ён адзначыў, што ў яго «вельмі добрыя адносіны з Кім Чэн Ынам».
«Многія людзі скажуць: о, гэта жудасна. Не, гэта добра. Сапраўды, калі-небудзь я яго ўбачу. Я з нецярплівасцю чакаю сустрэчы з ім… Я ведаю яго лепш, чым хто-небудзь, акрамя яго сястры. Яго сястра ведае яго дастаткова добра», — сказаў прэзідэнт Трамп.
Вэнс заявіў пра гатоўнасць Пуціна да «вялікіх кампрамісаў» па Украіне
Трамп так і не ўвёў санкцыі супраць Расіі і Пуціна. Ці варта верыць яго новым пагрозам?
Трамп даў Пуціну яшчэ два тыдні і дапусціў, што запросіць яго на чэмпіянат свету па футболе
Правялі ператрус у былога дарадцы Трампа па нацыянальнай бяспецы
Каментары
«Таму што ён яго не любіць. Ён яго не любіць. Яму ён не падабаецца. У мяне ёсць людзі, якія мне не падабаюцца. Мне не падабаецца сустракацца з імі. Дык як жа іх прымусіць сустрэцца? Яны насамрэч не любяць адзін аднаго».
Ах вось у чам праблема! А мы не разумалі!
Калі пуціну не падабаўся Зяленскі, можа трэба было пачакаць пару год пакуль ва Ўкраіне выберуць новага прэзідэнта? Не вытрымаў, пачаў вайну.
Ці, калі пуціну так няўтульна, можа трэба сыходзіць з пасады і не пакутаваць?
Ой, аб чым гэта я?!
Што пуцін, што трамп - такія ранімыя. Рамонкі - любіць-ня любіць, пакутнікі.