Цэнтральным мерапрыемствам 1 верасня ў Гомельскай вобласці было адкрыццё басейна пры гімназіі ў Хойніках. Каб гучна заявіць пра чарговы «падарунак» уладаў мясцовым жыхарам, у райцэнтр прыбылі старшыня аблвыканкама Іван Крупко і намеснік прэм'ер-міністра Наталля Пяткевіч. ДзяржСМІ паказалі яркую карцінку з пераразаннем стужачак, радаснымі дзецьмі, задаволенымі чыноўнікамі, танцамі, чырвона-зялёнымі сцяжкамі і пафаснымі словамі. Але жыхары Хойнікаў расказалі праўду ў каментарах да навіны ў сацсетках, піша «Флагшток».
Аказалася, што басейн закрылі адразу ж пасля адкрыцця, таму што аб'ект яшчэ не дабудаваны.
«Адкрылі на адзін дзень, каб прыгожа даць справаздачу, а потым — па дамах. На 1 верасня — стужачкі, музыка, усмешкі… А потым — закрыта, не дабудавана. Навошта было даваць надзею, калі ўсё гэта толькі на адзін дзень? Сумна, што паказуха важнейшая за рэальны вынік», — напісаў у сацсетцы адзін з карыстальнікаў.
«Ён закрыты, і рабочыя вывезлі мэблю прывезеную», — пацвердзіў іншы мясцовы жыхар.
«Флагшток» прагледзеў дзяржзакупкі па басейне ў Хойніках і высветліў, што будаўніцтвам аб'екта займалася УКБ Рэчыцкага раёна. У тэхзаданні, прымацаваным да дакументацыі, пазначаны тэрмін заканчэння работ — 24 верасня. Гэтая ж дата стаіць у тэндары па выкананні работ у рамках 4-га этапу праектавання.
Выходзіць, што ўлады, загадзя дакладна ведаючы пра тое, што аб'ект не будзе гатовы да 1 верасня, усё адно запланавалі шоу з адкрыццём басейна. Верагодна, патрабавалі ад будаўнікоў ісці з апярэджаннем графіка — але не выйшла. Таму каментары мясцовых жыхароў пра паказуху дакладна ахарактарызавалі сітуацыю.
Будаўніцтва фінансавалася з рэспубліканскага бюджэту. Калі падсумаваць усе закупкі, то агульная сума (пачынаючы ад тэндара па распрацоўцы дакументацыі) перавысіла 15 мільёнаў 800 тысяч рублёў — амаль 5,3 мільёна даляраў.
Што ў Хойніках гавораць пра рэальныя тэрміны адкрыцця аб'екта — і якія выказваюць меркаванні, — «Флагшток» сабраў прыклады:
«Адкрыццё ў канцы кастрычніка. Першага верасня яго адкрылі для паказухі. Пасля паказухі рабочыя працягваюць там працу. А старшыня раёна сказаў эканоміць ваду. Паказуху зрабілі, каб прэмію атрымаць».
«Яго закрылі адразу пасля ўрачыстага адкрыцця, бо не гатовы яшчэ, праз месяц-два па факце адкрыюць».
Адзін з карыстальнікаў сцвярджае, што наведвальнікаў у басейн пусцяць толькі ў снежні, і патлумачыў:
«Унутры нічога не зроблена. Афіцыйна будзе працаваць толькі са снежня».
«Флагшток» паспрабаваў высветліць дату адкрыцця басейна, але аказалася, што ні ў гімназіі, ні ў райвыканкаме яе не ведаюць. На званок ад імя мясцовага жыхара там не далі канкрэтных адказаў на пытанні, але прызналі, што басейн сапраўды не працуе.
Пад Мінскам прадаецца палац з двума басейнамі, СПА-комплексам і люстрай ростам з чалавека
«Такое — паўсюдна». Відэа з каровамі ў гразі ў Добрушскім раёне стала вірусным у сацсетках
Кіраўнік Белаазёрска расказаў пра падрыхтоўку да «Дажынак», а людзі захэйцілі ў каментарах
«Алімавіч! У нас Пульва!» Мэр беларускага горада пераблытаў назву адзінай ракі, якая праз яго цячэ
Каментары