Міністэрства замежных спраў Польшчы рэкамендуе ўсім сваім грамадзянам тэрмінова пакінуць Беларусь і ўстрымацца ад паездак туды. Пра гэта паведаміў прэс-сакратар МЗС Польшчы Павел Вроньскі падчас брыфінгу 5 верасня.
Прычына — затрыманне ў Беларусі каталіцкага манаха з Польшчы, якога мясцовыя спецслужбы абвінавацілі ў «шпіянажы» падчас маштабных расійска-беларускіх вучэнняў «Захад-2025».
4 верасня ўвечары па беларускім тэлебачанні паказалі рэпартаж з кадрамі арышту абвінавачанага. Затрыманы — Гжэгаж Гавел, каталік з Кракава, які належыць да ордэна кармелітаў.
Павел Вроньскі адзначыў, што гэтая справа выглядае як свядомая правакацыя Мінска, мэта якой — «як дэстабілізацыя сітуацыі ў Польшчы, так і ўмацаванне свайго іміджу ва Украіне. Мы не хочам удзельнічаць у такім тэатры».
Ён падкрэсліў, што Беларусь не з’яўляецца ні дэмакратычнай дзяржавай, ні сяброўскай краінай для Польшчы, таму палякі могуць сутыкнуцца там з сур’ёзнымі праблемамі.
МЗС Польшчы запэўніла, што будзе аказваць усю неабходную дапамогу затрыманаму грамадзяніну.
У сваю чаргу, Міністэрства замежных спраў Беларусі сёння выклікала часовага паверанага ў справах Польшчы Кшыштафа Ажану. Яму перадалі рашучы пратэст і ўручылі адпаведную ноту ў сувязі з тым, што польскі грамадзянін Гжэгаж Гавел нібыта здзейсніў акт шпіянажу на тэрыторыі Беларусі.
У МЗС Беларусі падкрэслілі, што такія дзеянні Варшавы непрымальныя, груба парушаюць прынцыпы добрасуседства і наносяць сур’ёзную шкоду двухбаковым адносінам. Польскаму боку было заяўлена, што Мінск мае намер даць прававую ацэнку інцыдэнту.
Таксама беларускія дыпламаты запатрабавалі ад Польшчы «ўстрымацца ад дзеянняў, якія наносяць шкоду нацыянальнай бяспецы Рэспублікі Беларусь, і вярнуцца ў рэчышча цывілізаванага дыялогу ды агульнапрынятых формаў міждзяржаўнай камунікацыі».
Цяпер чытаюць
Лукашэнка знайшоў незвычайныя словы для спачування Хаменеі: «вераломная атака»28
Каментары