Прэзідэнт Рэспублікі Малдова напярэдадні парламенцкіх выбараў у краіне звярнулася да выбарцаў з заклікам падтрымаць праеўрапейскія сілы, адзначыўшы, што Расія ўкладае вялікія сродкі для таго, каб прывесці да ўлады сваіх стаўленнікаў.
Як заявіла Майя Санду, Масква траціць «сотні мільёнаў даляраў», спрабуючы купіць галасы малдаўскіх грамадзян. Яна таксама адзначыла, што ў выпадку перамогі прарасійскіх сіл Малдова будзе адарванай ад Еўропы і можа стаць плацдармам для расійскіх аперацый у Адэскай вобласці Украіны, піша Расійская служба Радыё Свабода.
Санду заклікала выбарцаў Малдовы не паддавацца Расіі. Лідары так званага Патрыятычнага блока, які ўлады Малдовы называюць прарасійскім, абвінавацілі Санду ў запалохванні жыхароў краіны. Яны назвалі ўрад марыянеткамі амерыканскага фінансіста Джорджа Сораса.
Раніцай у панядзелак паліцыя Малдовы правяла маштабныя рэйды, затрымаўшы больш за 70 чалавек па абвінавачванні ў падрыхтоўцы беспарадкаў пасля выбараў па ўказцы Расіі. Лідары апазіцыі абвінавацілі ўлады ў палітычных пераследах іх прыхільнікаў.
Выбары ў Малдове пройдуць 28 верасня. Асноўная барацьба на выбарах разгортваецца паміж кіроўнай праеўрапейскай Партыяй дзеяння і салідарнасці і Патрыятычным блокам, сфармаваным сацыялістамі, камуністамі і шэрагам іншых палітычных сіл.
У парламент таксама можа прайсці партыя «Альтэрнатыва», ад пазіцыі якой, магчыма, будзе залежаць, хто сфармуе будучы ўрад. Некалькі партый, якія, паводле меркавання малдаўскіх уладаў, былі звязаны з асуджаным у Малдове завочна бізнесменам Іланам Шорам, які жыве ў Расіі, не былі дапушчаныя да выбараў.
У Еўрасаюзе таксама папярэджвалі пра пагрозы расійскага ўмяшання ў выбары ў Малдове.
У Маскве гэтыя абвінавачванні адмаўляюць і, наадварот, абвінавачваюць ва ўмяшанні ЕС. Служба знешняй разведкі Расіі ў аўторак выступіла з заявай, што краіны Захаду хочуць «акупаваць» Малдову, а прадстаўнік МЗС Марыя Захарава назвала «паранояй» словы Санду пра магчымасць выкарыстання непадкантрольнага ўладам Малдовы Прыднястроўя для расійскага наступу на Адэскую вобласць. У той жа час у Расіі гучаць абвінавачванні на адрас уладаў Малдовы і Украіны ў падрыхтоўцы ўзброенай акцыі супраць сепаратыстаў у Прыднястроўі.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам15
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2525
Каментары