Адна з самых загружаных транспартных артэрый Мінска — Партызанскі праспект. Тут сутыкаюцца інтарэсы дзясяткаў тысяч аўтамабілістаў і пасажыраў грамадскага транспарту. Для таго, каб выезд са сталіцы (у раёне станцыі метро «Магілёўская» і ГЦ «Мома») стаў больш камфортным, горадабудаўнікі задумалі шэраг пераўтварэнняў. Тут хочуць пабудаваць аўтавакзал з грамадска-гандлёвым комплексам і стварыць больш прыязнае асяроддзе для пешаходаў і веласіпедыстаў. Акрамя таго, побач з праспектам вырасце яшчэ адзін завод. У адміністрацыі Заводскага раёна хутка пачнецца абмеркаванне праекта, піша Realt.by.
Адміністрацыя Заводскага раёна Мінска праводзіць грамадскае абмеркаванне горадабудаўнічага праекта дэталёвага планавання зоны грамадскай шматфункцыянальнай забудовы ў раёне Партызанскага праспекта і МКАД. Гаворка ідзе пра тэрыторыю плошчай 37 гектараў.
Праектаваная тэрыторыя прымыкае адразу да дзвюх буйных магістраляў — гэта ўласна Партызанскі праспект і МКАД. Гэта вельмі загружаны ўчастак. Штодня менавіта праз гэтыя «вароты» ў горад уязджае да 60 тысяч аўтамабіляў. Акрамя таго, тут знаходзіцца канцавая станцыя чырвонай лініі метро — «Магілёўская», якой карыстаюцца жыхары Ангарскай, Шабаноў, Соснаў і ўсяго паўднёва-ўсходняга прыгарада сталіцы.
Пры гэтым на самім праектаваным участку жылых дамоў няма, тут прадстаўленая толькі вулічна-дарожная сетка (яна займае 34%), грамадская і вытворчая забудова. Сярод буйных аб'ектаў — ГЦ «Мома», Палац дзяцей і моладзі «Золак», некалькі адміністрацыйных будынкаў, пратэстанцкая царква Вефіль, дзве АЗС і аўтамыйка.
Што плануецца зрабіць?
Для стварэння запамінальнага архітэктурнага аблічча забудовы ў галаўной частцы Партызанскага праспекта і больш эфектыўнага выкарыстання тэрыторыі праектам прапануюцца наступныя пераўтварэнні.
Так, на месцы аўтастанцыі «Аўтазаводская» і часткі аўтазапраўкі «Беларуснафта» горадабудаўнікі хочуць узвесці адміністрацыйна-гандлёвы комплекс з аўтавакзалам і перахопліваючай аўтастаянкай (на плане — № 11).
Адзначаецца, што новы шматфункцыянальны грамадскі цэнтр неабходны для камфортнага абслугоўвання транзітнага пасажырскага патоку. Таксама тут будуць створаныя больш прыязныя ўмовы для пешаходаў і раварыстаў. У калідорах наяўных вуліц з'явіцца роварная і пешаходная інфраструктура, якой не хапала, а прыпынкі грамадскага транспарту і транспартна-перасадачныя вузлы для зручнасці гараджан будуць размяшчацца на адлегласці не больш за 200 метраў адзін ад аднаго.
Акрамя таго, праекціроўшчыкі маюць намер больш эфектыўна выкарыстоўваць пустыя тэрыторыі ў раёне вуліцы Сацыялістычнай — побач з наяўнымі заводамі МАЗ і МЗКТ. Тут зарэзервуюць участак пад будаўніцтва новага вытворчага прадпрыемства з базавай санітарна-ахоўнай зонай да 50 метраў (на плане — № 10). Тут жа ў будучыні пройдзе новая вуліца мясцовага значэння — Праектаваная № 1.
Матэрыялы праекта ўжо выкладзеныя на сайце адміністрацыі Заводскага раёна. Грамадскае абмеркаванне праекта будзе праходзіць з 2 па 16 лютага.
Заўвагі і прапановы з пазнакай «грамадскае абмеркаванне» прымаюцца ў тэрміны правядзення абмеркавання па адрасе: 220026, Мінск, вул. Жылуновіча, 17, або па электроннай пошце: [email protected]. Вынікі падвядуць на пасяджэнні архітэктурна-горадабудаўнічай Рады пры галоўным архітэктары горада Мінска.
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам13
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2020
Каментары