Выходзіць кніга «Традыцыйны інтэр’ер. Асобы», у якой вясковыя інтэр’еры паказаныя праз фотаздымкі саміх інтэр’ераў, партрэты герояў, а таксама фота посцілак і ручнікоў, покуці, вышывак і расповеды пра сваё жыццё 9‑ці жыхароў розных пакаленняў з усёй Беларусі, піша «Будзьма».
«Гэта гісторыя 80‑гадовага Дзеда Касмача з-пад Валожына, які вылечыўся свянцонай вадой і малітвамі, у часы СССР, калі вера была пад забаронай;
і знакамітай на ўвесь свет Бабы Каці (Кацярыны Аляксееўны Панчэні) з вёскі Пагост пра яе лёс і хату-музей, якая зрабіла для традыцыйнай культуры так шмат, і зведала столькі гора праз смерць сыноў;
гэта і расповеды сясцёр Веры (якая не ходзіць) і глуханямой Мані Нікановіч, якія ўсё жыццё пражылі разам і не зведалі кахання;
і гісторыя 90‑гадовай Нелі Міхнавец, закаханай у галубоў настолькі, што вышыла іх, напэўна, з 50 розных варыянтаў;
і замовы шаптухі Веры Якаўлеўны Царыкевіч, якая лячыла шэптам нават дактароў і ад рожы, і ад укусу змяі;
і маладая сям’я Шацёр, якая ў вясковай хаце пад Маладзечнам сабрала адну з самых вялікіх калекцый посцілак і вышавання;
і ўжо памерлая Алена Мікітаўна Музычэнка, якая жыла без святла і камунікацый у чарнобыльскай вёсцы Барталамееўцы, куды вярнулася пасля адсялення ў гарадскую кватэру.
Таксама ёсць у кнізе два тэксты ад куратаркі Ганны Карпенкі пра фатаграфічны праект і архіў «Традыцыйны інтэр’ер» і ад фалькларысткі Таццяны Валодзінай пра адметнасць беларускага інтэр’ера», — напісалі стваральнікі праекта «Беларускі традыцыйны інтэр’ер» у сваіх сацсетках.
Кніга мае 272 старонкі на ангельскай і беларускай мовах. З яскравым каляровым дызайнам і шчырымі гісторыямі беларусаў.
Кошт кнігі складзе каля 60 еўра ці 200 беларускіх рублёў.
Спасылка на форму папярэдняй замовы кнігі тут.
Цяпер чытаюць
Арыштаваны 75‑гадовы Зміцер Санько — ветэран-выдавец3
Каментары