Ён прывёз на фурманцы драўляныя ночвы, высыпаў у іх памідоры і ўваткнуў туды тры самаробныя плякаты. На адным было напісана «Кармушка». На другім: «Лукашэнка – жары і падавіся». А на трэцім – «Рабаўнік».
Пінскі гарсуд аштрафаваў на 620 тысяч рублёў (20 базавых велічыняў) жыхара вёскі Пінкавічы Леаніда Караля. Яго прызналі вінаватым у правядзеньні акцыі 2 верасьня на пінскім стадыёне «Хваля». Днём раней на стадыёне, які ўрачыста адкрывалі пасьля рэканструкцыі, прысутнічаў Аляксандар Лукашэнка.
У інтэрвію Радыё Свабода 66-гадовы пэнсіянэр Леанід Кароль паведаміў, за што яго пакаралі. Ён прывёз на фурманцы драўляныя ночвы, высыпаў у іх памідоры і ўваткнуў туды тры самаробныя плякаты.
(Кароль: ) «Я не памылюся, вядома. На адным было напісана «Кармушка». На другім: «Лукашэнка – жары і падавіся». А на трэцім – «Рабаўнік».
(Карэспандэнт: ) «Лёзунгі знаходзяцца ў міліцыі?»
(Кароль: ) «Так!»
Са словаў Леаніда Караля, яго змучыла цяперашняя бюракратыя. Ён кажа, што зьвяртаўся са скаргамі ў Пінкавіцкі сельсавет, запытваў, хто вінаваты ў праблемах, зь якімі ён сутыкаецца амаль штодня.
(Кароль: ) «Куды пайдзі, усе на Лукашэнку звальваюць! Я ж быў у сельсавеце, запытваю: «Што вы зь мяне дзераце? Гэта ж рабаўніцтва!» Адказваюць: «Гэта ня мы, а Лукашэнка!» Ну вось я ім і даказаў. Улада дала волю – купі-прадай. Пойдзе ў сельсавет, за права гандляваць заплаціць тры тысячы ці пяць, і ўсё – ён гаспадар! Кажа: «Бяру гэтыя памідоры за 200 рублёў за кіляграм». Завязе ў Менск. Мяне тут абадраў, а там – рабочага. Вось што мяне шакуе!»
Спадар Кароль згадвае, што колісь быў прыхільнікам перабудовы. Нагадвае, што выкрываў крадзяжы мясцовых начальнікаў:
(Кароль: ) «Я аднаго інжынэрыка падлавіў, ён незаконна скасіў траву на сена і забраў. Перабудова – трэба было нешта рабіць». Я інжынэрыка злавіў, пайшоў да пракурора. Гарбачоў жа прасіў гайдануць кола перабудовы. Вось я й гайдануў. І крыху ў Гарадзішча не патрапіў».
У вёсцы Гарадзішча на Піншчыне і цяпер месьціцца шпіталь для псыхічна нездаровых людзей. Леанід Кароль даводзіць, што празь яе прайшлі вядомыя яму палітычныя іншадумцы. Наконт прычынаў, што ўратавалі яго, кажа наступнае:
(Кароль: ) «Сэнс жыцьця ў чым можа быць? Каб кожны мяне таптаў? Навошта жыць без сумленьня!?»
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача16
Каментары