Палонныя беларусы

Адборачны матч да чэмпіянату Еўропы‑2012 паміж футбольнымі зборнымі Беларусі і Румыніі скончыўся з лікам 0:0.

Здавалася б, пасля перамогі нашых хлопцаў у Парыжы, стадыён павінен быў быць запоўнены. Але не, на «Дынама» было дастаткова вольных месцаў, асабліва ў ніжніх шэрагах.

Прызнацца, вялікага жадання ісці садзіцца на брудныя крэслы стадыёна становіцца ўсё менш і менш. Дзе павага нашай федэрацыі да заўзятараў?

Газеты з сабой пранесці таксама нельга. Некаторыя вынаходнікі хавалі абрыўкі прэсы, прабачце, сабе ў майткі. Толькі так атрымлівалася пранесці. Праўда, гэтым разам пры ўваходзе раздавалі невялічкія пакеты. І тое нейкі плюс.

А мінус — пільны надгляд пры ўваходзе. Міліцыянт углядаецца ў кожны шалік. Каб, не дай Бог, не было з Пагоняй, ці яшчэ чаго. Каб трапіць на трыбуны трэба прайсці праз тры кардоны міліцыі.

Як заўсёды, добра зараджалі група падтрымкі з Б‑12. Гукалі «Слава Радзіме», стадыён дапамагаў.

У адрозненні ад папярэдняга матчу, Штанге зрабіў дзве замены. Ян Цігараў загрыпаваў, і ягонае месца даверылі аўтару гола ў вароты французаў Сяргею Кісляку. А вастрыні атакі Віталя Радзівонава змяніў Сяргей Карніленка.

Менавіта легіянер казанскага «Рубіна» меў найбольш востры момант нашых за матч, але ў пачатку сустрэчы прабіў міма з перспектыўнага становішча.

Увогуле, забягаючы наперад варта сказаць, што нашы так і не нанеслі ніводнага ўдару ў створ румынскіх варот.

Не сказаць, каб карпацкага каманда надта актыўнічала ў нашых уладаннях. Але часам атакавала ўсё ж значна больш небяспечна. Некалькі разоў Юрыю Жаўнову давялося паказаць усё сваё майстэрства.

Другі тайм здалося, што каманды абсалютна забылі пра вароты. Беларусаў гэта тычыцца ў першую чаргу. Толькі пасля замены Глеба і выхаду Пуцілы з’явілася нейкая стройнасць у атаках.

Зрэшты, галоў у гэты вераснёўскі вечар на заўзятары так і не пабачылі – 0:0. Гэта ўжо трэці матч запар нашай каманды на «Дынама», калі беларусы сыходзяць з поля без забітых мячоў (раней у сустрэчах з Украінай і Швецыяй).

Як бы тое не было, але нічыя з больш рэйтынгавым супернікам пакідае беларусам добрыя шанцы на працяг барацьбы за пуцёўку на Еўра‑2012. Трэба толькі гуляць у больш актыўны футбол. Сёння ж нашы былі, як палонныя.

Таксама сёння ў нашай групе Албанія дома мінімальна перамагла Люксембург — 1:0. Боснія — Францыя — 0:2.

Пасля двух тураў табліца ў групе D выглядае наступным чынам: Албанія, Беларусь — па 4 пункты, Боснія, Францыя — па 3, Румынія — 2, Люксембург — 0.

Наступныя матчы адбудуцца 8‑9 кастрычніка: Люксембург — Беларусь, Албанія — Боснія, Францыя — Румынія.

• 0
• 0
• 0
• 0
• 0
• 0
• 0
• 0