Затрыманага ў нядзелю на літоўскай мяжы сябра БХД і ініцыятыўнай групы Віталя Рымашэўскага Вадзім Кабанчук асуджаны сёньня ў Маскоўскім судзе на 10 сутак адміністратыўнага арышту за ўдзел у акцыі пратэсту супраць фальсіфікацыі вынікаў выбараў 19 снежня 2010 года на Плошчы Незалежнасьці ў Менску.
Маці Вадзіма магілёўская абласная каардынатарка БХД Таісія Кабанчук разам зь іншымі сябрамі БХД дзяжурылі сёньня ў судзе з самай раніцы, каб перадаць перадачу і даведацца пра лёс Вадзіма. Але пабачыць сына і перадаць яму ежу, пітво ды цёплыя рэчы ў маці так і не атрымалася. У канцылярыі не давалі ніякай інфармацыі да таго часу, як суд ня скончыўся, і Вадзіма не павезьлі назад на Акрэсьціна.
Нагадаем, Вадзім Кабанчук у нядзелю ўвечары вяртаўся ў Беларусь з Вільні і быў затрыманы на памежным пераходзе Каменны лог на мяжы зь Літвой. Ён меў пры сабе каля 100 газэтаў пра падзеі ў краіне пасьля прэзыдэнцкіх выбараў, выдадзеных беларускімі актывістамі па-за межамі Беларусі. Мытнікі пры аглядзе сканфіскавалі гэтыя інфармацыйныя матэрыялы на экспэртызу, склаўшы адпаведны пратакол.
Самога Кабанчука спачатку больш за чатыры гадзіны трымалі на мяжы, затым выклікалі міліцыю з Ашмянаў і адвезьлі ў мясцовы РАУС, дзе склалі пратакол за быццам бы супраціў мытнікам.
Чакалася, што суд над ім адбудзецца ў панядзелак ў Ашмянскім судзе, але ў сакратарыяце адказвалі, што такой справы ў іх не разглядаюць. Пазьней высьветлілася, што ўчора ўвечары яго перавезьлі ў Менск на Акрэсьціна.
Цяпер чытаюць
Дзмітрый Лукашэнка хоча паставіць пад кантроль усе мабільныя тэлефоны6
Каментары