Агульная колькасць выпадкаў ВІЧ-інфекцыі ў Мінску дасягнула 1.665 — інфікаваныя 572 жанчыны і 1.093 мужчыны. Пра гэта на прэс-канферэнцыі 15 лютага паведаміў намеснік галоўнага лекара па амбулаторна-паліклінічным раздзеле працы Гарадской інфекцыйнай клінічнай бальніцы Мінска Дзмітрый Падута.
Паводле яго слоў, у 2010 годзе ў сталіцы было зарэгістравана 188 новых выпадкаў ВІЧ-інфекцыі, сярод іх 82 — сярод жанчын, 106 — сярод мужчын. Прыблізна столькі ж выпадкаў было выяўлена ў 2009 годзе. Пры гэтым дамінантным стаў гетэрасексуальны шлях распаўсюджвання інфекцыі (97 чалавек). Прычынай інфікавання шасці чалавек сталі гомасексуальныя кантакты, 76 — ін’екцыйнае ўжыванне наркатычных сродкаў. Тром дзецям, народжаным ад ВІЧ-інфікаваных маці, пацверджаны гэты дыягназ.
Па колькасці ВІЧ-інфікаваных Мінск займае трэцяе месца ў Беларусі пасля Гомельскай і Мінскай абласцей. Найболей высокі ўзровень распаўсюджанасці ВІЧ-інфекцыі ў сталіцы зафіксаваны ў Заводскім раёне (402 выпадкі), Фрунзенскім (215) і Ленінскім (191). Большасць ВІЧ-інфіцыраваных — маладыя людзі 20–34 гадоў (1.286 выпадкаў).
Як паведаміў Падута, з 1987 года ў Мінску зафіксавана 158 выпадкаў СНІДу, 87 чалавек ужо памерлі ад гэтага захворвання, уключаючы 13 чалавек у 2010 годзе. Спецыфічнае лячэнне ў сталіцы атрымліваюць 360 пацыентаў, у тым ліку 11 дзяцей.
Каментары