якія сродкі самаабароны могуць прымяняць мірныя грамадзяне ў дачыненні да невядомых асоб, што напалі на іх.
Рух "За Свабоду" просіць МУС растлумачыць, якія сродкі самаабароны могуць прымяняць мірныя грамадзяне ў дачыненні да невядомых асоб, што напалі на іх.
Як паведаміў намеснік старшыні арганізацыі Юрый Губарэвіч, рух вырашыў звярнуцца ў МУС у сувязі з тым, што "ў апошні час фіксуюцца шматлікія факты нападу невядомых грамадзян на прахожых у розных гарадах краіны". "Людзі ў цывільным, ужываючы грубую фізічную сілу, хапаюць мірных грамадзян і, у некаторых выпадках збіваючы іх, зацягваюць у аўтамабілі, аўтобусы (часта без нумароў) ці транспартныя машыны спецназа. Пасля гэтага іх дастаўляюць у аддзяленні міліцыі, дзе паведамляюць пра тое, што яны з'яўляюцца затрыманымі ў межах адміністрацыйнага працэсу", — адзначыў Губарэвіч.
У руху "За Свабоду" лічаць, што практыка такіх затрыманняў у дачыненні да грамадзян, якія рэалізуюць сваё права на свабоду слова і свабоду мірных сходаў, супярэчыць палажэнню Усеагульнай дэкларацыі правоў чалавека аб тым, што ніхто не можа быць самавольна арыштаваны ці затрыманы; грубым чынам парушае канстытуцыйныя правы і свабоды чалавека; у сур'ёзнай ступені пазбаўляе чалавека сродкаў абароны і працэсуальных гарантый справядлівага разгляду.
У сувязі з гэтым, паведаміў Губарэвіч, арганізацыя звярнулася ў МУС Беларусі з наступнымі пытаннямі:
- якія законныя сродкі самаабароны могуць быць ужытыя мірнымі грамадзянамі ў дачыненні да невядомых асоб, якія нападаюць на іх;
- якія законныя сродкі самаабароны могуць быць ужытыя мірнымі грамадзянамі ў выпадку, калі нападаючыя з'яўляюцца пераапранутымі ў цывільнае адзенне супрацоўнікамі падраздзяленняў МУС, але пры затрыманні мірных грамадзян яны не выконваюць прадугледжаную законам працэдуру затрымання, часам ужываючы пры гэтым фізічную сілу і спецыяльныя сродкі;
- у выпадку калі затрыманне мірных грамадзян ажыццяўляюць супрацоўнікі падраздзяленняў МУС, але пры гэтым незаконна ўжываюць фізічную сілу і спецыяльныя сродкі, не выконваюць прадугледжаную законам працэдуру затрымання, якія законныя сродкі самаабароны могуць быць ужытыя мірнымі грамадзянамі ў адказ на заведама незаконныя дзеянні супрацоўнікаў МУС.
Губарэвіч паведаміў, што гэтыя пытанні 4 ліпеня былі адпраўленыя ў МУС праз афіцыйны інтэрнэт-сайт міністэрства. "Аднак на сайце адзначана, што падобныя паведамленні не падпадаюць пад закон "Аб зваротах грамадзян" і могуць застацца без адказу. Таму, верагодна ўжо сёння, зварот будзе перададзены ў МУС у пісьмовым выглядзе", — сказаў ён.
Сяргей Каралевіч, БелаПАН.
Каментары