В.Вячорка: «Кангрэс безь Мілінкевіча — гэта ўжо не Кангрэс аб’яднаных дэмсілаў»
Але і Мілінкевіч без аб’яднаных дэмсілаў — гэта ўжо не ўсеагульны лідэр».
Старшыня Палітрады аб’яднаных дэмакратычных сілаў Аляксандар Мілінкевіч заявіў, што ня можа ўдзельнічаць у сакавіцкім Кангрэсе дэмсілаў. Паводле Мілінкевіча, такі Кангрэс прывядзе да разьяднаньня апазыцыі. Як на гэта рэагуюць у палітычных партыях?
Пра свой няўдзел у кангрэсе Аляксандар Мілінкевіч заявіў падчас нядаўняй сустрэчы зь лідэрамі Партыі БНФ Вінцуком Вячоркам, Аб’яднанай грамадзянскай партыі Анатолем Лябедзькам і Партыі камуністаў беларускай Срягеем Калякіным. Потым спадар Мілінкевіч выступіў з заявай да дэмакратычнай грамадзкасьці Беларусі.
Анатоль Лябедзька патлумачыў:
Лябедзька: «Відавочна, што аб’яднаныя дэмакратычныя сілы ад гэтага часу ня маюць лідэра ня толькі дэ?юрэ, але і дэ?факта. Відаць, было прынятае рашэньне, што Аляксандар Мілінкевіч вяртаецца туды, адкуль ён прыйшоў у палітыку. Гэта значыць, у грамадзкі сэктар.
Няма палітычнай волі будаваць агульную, шырокую кааліцыю, а ёсьць жаданьне заняцца будаўніцтвам нейкай новай грамадзкай сеткі — накшталт рэсурсавых цэнтраў. Гэта, відаць, той асяродак, які найбольш камфортны і прымальны для Аляксандра Мілінкевіча».
Паводле спадара Лябедзькі, кангрэс адбудзецца, аднак не ў абвешчаны раней час.
Вінцук Вячорка не ўхваляе заявы Аляксандра Мілінкевіча і лічыць ягоную пазыцыю памылковай:
Вячорка: «Як і любыя ўльтыматыўныя заявы, напрамую не зьвязаныя з нашай стратэгіяй, з барацьбой за незалежнасьць і свабоду Беларусі, ідуць на шкоду. Яны зьяўляюцца раскольніцкімі. Калі мы пачнем паасобку разьбягацца, разьядноўвацца, што цяпер запачаткоўвае Аляксандар Мілінкевіч, гэта значыць, што нас паасобку проста ня будуць чуць. І такі крок б’е і па кангрэсе, і па палітычных партыях, і па самім Аляксандру Мілінкевічу».
Паводле спадара Вячоркі, Партыя БНФ прапаноўвала кампраміс, каб захаваць рэсурс спадара Мілінкевіча як вядомай постаці й лучнасьць аб’яднанай апазыцыі. Цяпер вынікае, што ён адмаўляецца ад разумных кампрамісаў, мяркуе Вячорка.
Вячорка: «Мы прапанавалі перад кангрэсам падпісаць новае пагадненьне, у якім забясьпечвалася б для Мілінкевіча пазыцыя паўнамоцнага прадстаўніка аб’яднаных дэмсілаў, гэткага Хавіера Саляны, правамоцнага выказьніка рашэньняў палітрады. А выканаўча?каардынацыйная функцыя ажыцьцяўлялася б тымі моцнымі партыямі, якія маюць структуры ва ўсіх рэгіёнах, паводле прынцыпу ратацыі».
Партыя БНФ мае паўтарыць сваю кампрамісную прапанову Аляксандру Мілінкевічу.
Вячорка: «Таму што мы разумеем, што кангрэс безь Мілінкевіча — гэта ўжо не кангрэс аб’яднаных дэмсілаў, але і Мілінкевіч без аб’яднаных дэмсілаў — гэта ўжо не ўсеагульны лідэр».
Для разьвязаньня канфлікту мяркуецца склікаць палітраду аб’яднаных дэмсілаў. Таксама дамовіліся, што Аляксандар Мілінкевіч разам са спадарамі Вячоркам, Лябедзькам і Калякіным паедзе ў рэгіёны — у наступныя выходныя плянуецца паездка ў Гомель.
Каментары