«Гэта не дыялёг, гэта імітацыя», — сьцьвярджае экс‑міністар.
Ад удзелу ў сэмінары пад эгідай АБСЭ «Вывучэньне магчымасьцяў Беларусі ў рамках Эўрапейскай стратэгіі суседзтва», які заўтра пачынаецца ў Менску адмовіўся Міхаіл Марыніч.
Экс‑міністар замежнаэканамічных сувязяў заявіў «Белорусскому партизану»:
«Я катэгарычна адмовіўся ад удзелу ў гэтай сустрэчы. Таму што ў той момант, калі арыштоўваюць людзей, ‑‑ гэта бессэнсоўна і амаральна. Ніводны з запрошаных прадстаўнікоў дэмакратычнага блёку ня быў заяўлены ў выступах, хоць прадстаўнікам улады слова будзе дадзена. Атрымліваецца, што нас клічуць на гэта мерапрыемства як статыстаў.
Я паставіў гэтае пытаньне перад паслом АБСЭ, але рэглямэнт усё роўна пакінулі.
Пазыцыя ўлады: заміж кампрамісу толькі імітацыя перамоваў. Нават на шараговы сэмінар па памежным супрацоўніцтве не былі запрошаныя сур’ёзныя палітычныя лідэры, апазыцыйныя ўладзе. Тым, каго запрасілі, папросту не даюць слова. Гэта не дыялёг, а імітацыя. Я ў гэтым удзельнічаць намеру ня маю».
Каментары