Як паведамляецца на сайце Міністэрства адукацыі, рэгістрацыя будзе праводзіцца з 2 мая па 1 чэрвеня ўключна — з 9.00 да 19.00 у будныя дні, а таксама па суботах 19 і 26 мая — з 9.00 да 18.00.Абітурыент павінен асабіста падаць заяву на ЦТ у любым пункце рэгістрацыі, спіс якіх размешчаны на сайце Мінадукацыі, і атрымаць пропуск на ЦТ. Неабходна таксама мець з сабой дакумент, які сведчыць асобу, і дакумент аб унясенні платы за прыём і афармленне дакументаў для ўдзелу ў ЦТ (за кожны прадмет неабходна заплаціць 10 тыс. рублёў). Ад выплаты ўзносу вызваленыя інваліды, дзеці-сіроты, дзеці, якія засталіся без апекі бацькоў, дзеці з мнагадзетных сем'яў і сем'яў ваеннаслужачых, работнікаў органаў МУС, якія загінулі або сталі інвалідамі пры выкананні вайсковых і службовых абавязкаў.
Пры паступленні ў ССНУ абітурыент можа зарэгістравацца на два тэст-выпрабаванні; пры паступленні ў ВНУ — не больш чым на тры вучэбныя прадметы: беларускую або рускую мову па выбары; два прадметы ў адпаведнасці з профілем спецыяльнасці.
Сёлета цэнтралізаванае тэставанне пачнецца 13 чэрвеня, на дзень раней, чым летась, і завершыцца на два дні раней, 27 чэрвеня.Адкрыецца ЦТ выпрабаваннем па беларускай мове 13 чэрвеня. 14 чэрвеня абітурыенты змогуць здаць расійскую мову, 16 чэрвеня — біялогію, 17 чэрвеня — матэматыку, 19 чэрвеня — грамадазнаўства, 20 чэрвеня — хімію, 21 чэрвеня — сусветную гісторыю навейшага часу, 23 чэрвеня — фізіку, 24 чэрвеня — гісторыю Беларусі, 26 чэрвеня — замежныя мовы (англійскую, нямецкую, іспанскую, французскую). Завершыцца ЦТ 27 чэрвеня выпрабаваннем па геаграфіі. Пачатак усіх выпрабаванняў у 11.00.
Для абітурыентаў, якія не ўдзельнічалі ў ЦТ у асноўны дзень па ўважлівай прычыне, устаноўлена рэзервовая дата — 4 ліпеня. Пунктам правядзення ЦТ па ўсіх вучэбных прадметах у рэзервовы дзень з'яўляецца БДУ.
Зарэгістравацца для ўдзелу ў ЦТ у рэзервовы дзень можна будзе з 27 чэрвеня па 1 ліпеня ў адным з наступных пунктаў: Беларускі дзяржаўны ўніверсітэт (БДУ), Брэсцкі дзяржаўны ўніверсітэт, Гродзенскі дзяржаўны ўніверсітэт імя Янкі Купалы, Віцебскі дзяржаўны тэхналагічны ўніверсітэт, Гомельскі дзяржаўны тэхнічны ўніверсітэт імя Сухога, Беларуска-Расійскі ўніверсітэт.
Каментары