Няма згоды ў меркаваньнях наконт уплыву марыхуаны на здароўе людзей. Як сьцьвярджае брытанскі мэдычны экспэрт, доўгатэрміновыя наступствы яе рэгулярнага ўжываньня могуць стацца такімі ж небясьпечнымі, як і наступствы паленьня тытуню.
Сёньня ў Вялікай Брытаніі гашыш рэгулярна паляць 3,2 млн. чалавек, а тытунь — 13 мільёнаў. Паленьне тытуню штогод выклікае каля 120 тыс. сьмерцяў праз сардэчныя хваробы, рак лёгкіх ды інш. Аднак дагэтуль не было адназначных доказаў адпаведнага шкоднага ўзьдзеяньня марыхуаны.
Атрымаць іх цяжка, бо шмат хто з аматараў гашышу паліць і тытунь. Дый маштабныя дасьледаваньні сярод людзей, якія прызналіся б у спажываньні нелегальных наркотыкаў, правесьці цяжка. Таму ўрад краіны спрабуе «панізіць» статус гашышу з клясы «В» да клясы «С» — то бок яго ўжываньне заставалася б нелегальным, але за гэта і ў турму не садзілі б. Калі, вядома, няма «дадатковых абставінаў», кшталту паленьня гашышу побач зь дзецьмі.
Аднак прафэсар-таксыколяг Джон Генры зь лёнданскага «Імпэрыял Коледж» сьцьвярджае: калі б доўгатэрміновыя наступствы ад ужываньня гашышу былі такімі ж небясьпечнымі, як ад паленьня тытуню, колькасьць сьмерцяў ад гашышу была б значна большая. Калі ад цыгарэтаў штогод памірае 120 тыс. чалавек з 13 мільёнаў, дык з 3,2 млн. чалавек, якія ўжываюць гашыш, штогод памірала б 30 тысячаў. Але нават невялікая колькасьць сьмерцяў дазваляе лічыць гашыш пагрозай здароўю. Хоць «дозы» гашышу значна меншыя, патэнцыйная небясьпека ад кожнай «зацяжкі» вышэйшая. Падчас спальваньня гашышу і тытуню выдзяляюцца каля чатырох тысячаў ідэнтычных хімічных рэчываў.
Прагнозы адносна колькасьці сьмерцяў ад гашышу няпэўныя і таму, што пакуль невядома, ці працягне сёньняшняя моладзь рэгулярна паліць гашыш у больш сталым веку. Калі не, дык тэарэтычна рызыка заўчаснай сьмерці значна зьнізіцца. Таксама як аматары тытуню могуць зьнізіць рызыку захворваньня на рак, кінуўшы паліць да сярэдняга веку.
Каментары