Mahiloŭskija dzivosy

Siaredniaja temperatura tydnia — 30 hradusaŭ. Płaviacca mazhi. Jupiter zajšoŭ za Veneru, a Leŭ apynuŭsia ŭ domie Bliźniataŭ. U Mahilovie — kaskad niaščasnych vypadkaŭ i złačynstvaŭ.

Ranicaj u paniadziełak sonca ŭzychodziła ŭ kryvavyja ciažkija chmary i nieba čarnieła. Niemahčyma narmalna rastłumačyć, što adbyłosia z Mahilovam na minułym tydni. Hod tamu znajomaja ŭsim u horadzie klikuša praklinała abłasny centar za raspustu.

Viartajusia ŭ rodny horad mienskaj šašoj, na ŭjeździe na centralny praspekt pasiaredzinie asfaltu plaminy piasku. Tak zasypajuć plamy kryvi paśla avaryi. Dvoje paciarpiełych. Dumaju, zaŭtra pra heta raskažuć usie hazety. Ja jašče nia viedaŭ, dzie apynuŭsia.

Abłasnaja televizija nazvała heta kaskadam niaščasnych vypadkaŭ i złačynstvaŭ. Try rabočyja harbarni čyścili kanalizacyju i zadychnulisia parami sieravadarodu. Toj, što stajaŭ na pavierchni, pierš čym stracić prytomnaść paśpieŭ paklikać na dapamohu. Dvuch inšych, jakija čyścili samu trubu, nia vyratavali. Z dachu dzieviacipaviarchoŭki zvaliŭsia rabočy-ramontnik. A voś paŭtarahadovaj Viktoryi z vulicy Dabralubava niechta niajnačaj čaroŭnuju piarynu padkłaŭ. Kali maci vynosiła vannačku paśla kupańnia, dziaŭčo vyvaliłasia z akna siomaha pavierchu. Vyratavała klumba. Ad padzieńnia adny siniaki i drapina na łbie. Na nastupny dzień maci Viktoryi pabiehła stavić śviečku ŭ carkvie — napeŭna, za zdaroŭje dyrektara ŽREU, što dobraŭparadkavaŭ dvor.

Boh dapamahaje dzieciam, durnym i pjanym. U apošnim pierakanalisia dva junaki, što skočyli z mostu cieraz Dniapro i zastalisia žyvyja. Hłybinia pad mostam miescami metar-paŭtara. Vyłavili ich adrazu, adnaho nakiravali ŭ vyćviareźnik, druhoha ŭ balnicu — stuknuŭ hrudzi.

U toj ža dzień — 13 lipienia — pad čyhunačnym mostam praviarali na tryvałaść aŭtamabil «nisan». Spačatku rejsavy «Ikarus» prycior jaho da ściany, bo zanadta vuzkim akazaŭsia prajezd pad mostam. Abiedźvie mašyny stali zboč darohi, i praz chvilinu pad most zajechała «škoda». Zahladzieŭšysia na pabity «nisan», jaje kiroŭca z usiaho machu ŭjechaŭ u «Ikarus» i začapiŭ «nisan». Apošni ramontu ciapier nie padlahaje, zatoje aŭtobus amal nie paciarpieŭ. Paciarpieła pasažyrka «škody» — pałamała nahu.

Čatyry kuli ŭ hrudzi zakončyli žyćcio cyhana-mafijozi. Padčas ahladu milicyjantami cieła z-pad ruki trupa vykaciłasia hranata F-1… Vybuchu nie adbyłosia.

Viestki z rehijonaŭ — jak dadatak da navin z abłasnoha centru. U Horkach patanuŭ nihieryjec, pad Białyničami ściana abvaliłasia na dvuch studentaŭ z budatradu. Pieračytvaju proźviščy. Maje studenty, ź minułaj sesii. Ciapier abodva ŭ reanimacyi. Pra apošni vypadak «NN» paviedamlała ŭ minułym numary. Dadać možna krychu — z pasady byŭ źniaty dyrektar kałhasu «Naša Pieramoha», choć jakoje dačynieńnie jon maje da vykanańnia techniki biaśpieki na miescach, niajasna.

Kala vioski Dudarava na Škłoŭščynie, u niadzielu nieviadomy aŭtaamatar pierajechaŭ pjanieńkaha dziadźku, jaki valaŭsia na šašy. Kali vieryć Hohalu, u Zaparožžy pjanych kazakaŭ na darozie pavažliva abjaždžali. Ale što tut skažaš, kazaki ž.

Užo niekalki dzion u Mahilovie — zacišša.

• 0
• 0
• 0
• 0
• 0
• 0
• 0
• 0