Reklama — ruchavik prahresu. Ale, jak kožny ruchavik, pracavać jana musić biezdakorna. Apošnim časam usio čaściej sustrakajecca reklama pa-biełarusku. Siarod prychilnikaŭ našaje movy źjaŭlajucca nia tolki suśvietnyja vytvorcy bytavoj techniki, srodkaŭ suviazi dy aŭtamabilaŭ, ale j ajčynnyja pradpryjemstvy — jak bujnyja, tak i drobnyja. Pa-biełarusku afarmlajucca vitryny kramaŭ i kaviarniaŭ, transpartnyja prypynki. I tut nie zaŭsiody panuje pryhožaja j biezdakornaja mova. Adzin z vytvorcaŭ prapanuje čypsy z «hustam cybuli i śmiatany». A možna pačuć i takoje: «Piej «Pepsi» i vyjhraj…». Uražańnie, što niechta paškadavaŭ času i srodkaŭ na specyjalistaŭ u halinie pierakładu. U lubym razie vychodzić niepryhoža i nieprafesijna, što adbivajecca na prestyžy tych, chto maje taki padychod da reklamy svajho tavaru. Pahatoŭ jość vartyja pierajmańnia prykłady, kali spravu daviarajuć specyjalistam — toje ž Tavarystva biełaruskaj movy nikoli nie admović u pasłuhach.
Taksama siarod biełaruskamoŭnych reklamadaŭcaŭ jość paśladoŭnyja — takija, što nie abmiažoŭvajucca tolki drukavanaj reklamaj i bihbordami, ale i majuć sajty ŭ Internecie pa-biełarusku. Dla kahości mova — tolki fasad. Taja ž «Krynica» nia moža nie razdražniać niezrazumiełymi nadpisami na kontretykietkach piŭnych plašak — «Krinica» «Kłasičnaje».
Nazvy kramaŭ i ich vitryny taksama pakidajuć šmat pytańniaŭ. Adna z kaviarniaŭ, raźmieščanaja na niadaŭna pierajmienavanym praspekcie, prapanujučy francuskuju vypiečku, «šanoŭna» zaprašaje svaich naviednikaŭ. A žychary Sierabranki pryčakali narešcie adkryćcia minimarkietu ź dziŭnaj nazvaj «Sieriebriannaja vieža». Čamu nie «Załataja bašnia»?
Ale nia moža nia ciešyć voka naš adkaz «Oranžievomu vierbludu» — krama dziciačaj vopratki z trapnaj nazvaj «Apranajka». Tak i prosicca ŭśled nazva dla darosłaj ustanovy adpačynku — stryptyz-baru — «Raspranajka».
Dziakujučy kłopatu siabroŭ TBM biełaruskaja mova hučyć u transparcie. Ale j tut zdarajucca niečakanaści i impravizacyi. Asabliva pakazalnym u hetym vypadku źjaŭlajecca soty aŭtobusny maršrut. Šanoŭnamu spadarstvu tut nastojliva rajać «nie pieriebiehať dorohu pieried dvižuŝimsia transportom», a taksama «priedjavlať dokumienty na projezd kanduktaru abo vadzicielu». Pa lohicy takoha pierakładu, pačuŭšy toje samaje całkam pa-biełarusku, šanoŭnaje spadarstva tut ža kiniecca pad pieršy ž transpartny srodak i naadrez admovicca priedjavlať nieabchodnyja dakumenty.
Vyklikaje narakańni haradžan i afarmleńnie prypynkaŭ. U hazetu «Va-bank» źviarnulisia žychary vulicy Laŝinskaha (pa versii darožnaj słužby, što afarmlała aŭtobusny prypynak).
Stalica ŭ hetym sensie nie vyklučeńnie. U Horadni možna prahulacca pa uł.Ciehlannoj, vyjści na prypynku «Rembytciechnika» i padjeści «sasisiek» u pryvakzalnaj zabiahałaŭcy.
Zrešty, budziem aptymistami. Budučynia za piśmiennaj i pryhožaj movaj, a što da kurjozaŭ i lapaŭ, to drukavanaje słova zrobić svaju spravu — damalavali ž koski na aficyjoznych plakatach «Kvitniej, Biełaruś!»
Kamientary