Kryminalnuju spravu za źbivańnie piensijaniera ŭ milicyi Leninskaha rajona spynili

Kryminalnaja sprava ŭ dačynieńni da supracoŭnikaŭ Leninskaha RUUS Minska, udzielnikaŭ incydentu z vartaŭnikom aŭtastajanki Vasilom Saročykam, spyniena.

Jak paviedamiŭ aficyjny pradstaŭnik Upraŭleńnia Śledčaha kamiteta pa Minsku Alaksandr Hierasimaŭ, sabranyja dokazy nie paćviardžajuć učynieńnie padazronymi supracoŭnikami milicyi kryminalna-karalnych dziejańniaŭ.

U toj ža čas, adznačyŭ jon, «ustanoŭleny parušeńni milicyjanierami Kryminalna-pracesualnaha kodeksa pry praviadzieńni pracesualnych dziejańniaŭ». Tamu da ich prymienieny miery dyscyplinarnaha ŭździejańnia.

Ab katavańniach u dačynieńni da Saročyka, vartaŭnika aŭtastajanki, jakaja raźmieščana pa vulicy Malinina ŭ Minsku i naležyć UP «Ramen», paviedamiła pravaabarončaja infarmacyjna-aśvietnaja ŭstanova «Płatforma». Na sajcie «Płatformy» (www.platformarb.com) byŭ raźmieščany videaraskaz paciarpiełaha. Zatym jon paŭtaryŭ svoj raskaz na pres-kanfierencyi.

Incydent adbyŭsia 14 listapada.

Pavodle słoŭ Saročyka, opierupaŭnavažanaja nadzieła na jaho naručniki i stała źbivać, patrabujučy pryznacca ŭ kradziažy nadmahilnych plit, jakija zachoŭvalisia na terytoryi aŭtastajanki, a taksama salarki i akumulataraŭ z mašyn. Akramia taho, ad vartaŭnika sprabavali dabicca pryznańnia ab tym, što jon pieryjadyčna rabavaŭ kijoski na rynku «Śviełta».

Piensijanier pasprabavaŭ rastłumačyć, što nie viedaje, pra što idzie havorka, ale paśla hetaha paboi tolki ŭzmacnilisia. Jak śćviardžaje Saročyk, jaho bili nahami i dubinkami pa hałavie i ciele, da źbivańnia pieryjadyčna padklučalisia inšyja supracoŭniki RUUS. Katavańni supravadžalisia niecenzurnaj łajankaj i pahrozami zabojstva. Kali sastareły čałaviek hublaŭ prytomnaść, jaho pryvodzili ŭ prytomnaść, ablivajučy chałodnaj vadoj.

Usio heta doŭžyłasia prykładna šeść hadzin, ale nijakaha pryznańnia ad Saročyka milicyjaniery nie atrymali. U vyniku ŭ dačynieńni da jaho skłali niejki dakumient, jaki piensijanier padpisaŭ, kali ŭžo byŭ nie ŭ stanie jaho pračytać, i adpuścili damoŭ.

Ź milicyi Saročyk adpraviŭsia ŭ 10-ju haradskuju kliničnuju balnicu, kab źniać paboi, ale tam ad jaho zapatrabavańni nakiravańnie z RUUS. Tady źbity vartaŭnik źviarnuŭsia z zvajavaj u prakuraturu Leninskaha rajona Minska i ŭ IAU «Płatforma» z prośbaj ab dapamozie. «Płatforma», u svaju čarhu, prainfarmavała ab zdareńni Hienprakuraturu, MUS i Śledčy kamitet. Prakuratura nakiravała materyjały ŭ Leninski rajonny adździeł SK, jaki pravodziŭ pravierku, zatym rabotu pradoŭžyła ŭpraŭleńnie Śledčaha kamiteta pa Minsku.
U kancy listapada źjaviłasia infarmacyja, što na Saročyka pačaŭsia cisk z boku milicyi. Jamu telefanavali pradstaŭniki Leninskaha RUUS, na aŭtastajancy, dzie jon pracuje, sprabavali pabyvać niekalki supracoŭnikaŭ orhanaŭ unutranych spraŭ. Pravaabaroncy ličać, što milicyjaniery chacieli prymirycca ź piensijanieram.
12 śniežnia MUS i SK aficyjna zajavili, što asnoŭnaja zadača śledstva pa spravie ab pieravyšeńni ŭłady supracoŭnikami Leninskaha RUUS — «praviadzieńnie niezaležnaha rasśledavańnia i ŭstanaŭleńnie iściny». 13 śniežnia było abjaŭlena: śledstva pryznała padazronymi va ŭčynieńni złačynstva pa č. 3 art. 426 KK (pieravyšeńnie ŭłady abo słužbovych paŭnamoctvaŭ, učynienaje słužbovaj asobaj, jakoje jaŭna vychodzić za miežy pravoŭ i paŭnamoctvaŭ, dadzienych pa słužbie) čatyroch słužbovych asob Leninskaha RUUS stalicy. Na padstavie art. 223 i 224 KPK z udziełam paciarpiełaha 11 śniežnia byli praviedzieny pracedury apaznańnia. Pa ich vynikach, a taksama na padstavie inšych materyjałaŭ kryminalnaj spravy śledstvam byli pryniatyja pracesualnyja rašeńni ab pryznańni supracoŭnikaŭ milicyi padazronymi. Miera strymańnia ŭ dačynieńni da ich nie abirałasia.
U statusie padazronych znachodzilisia opierupaŭnavažany Žanna Bahdanoŭskaja i troje supracoŭnikaŭ-mužčyn, jakich apaznaŭ Saročyk.

• 0
• 0
• 0
• 0
• 0
• 0
• 0
• 0