Deputaty pałaty pradstaŭnikoŭ 13 listapada pryniali ŭ druhim čytańni papraŭki ŭ niekatoryja zakony pa pytańniach praviadzieńnia vybaraŭ i refierendumaŭ, suprać jakich vystupajuć apazicyjnyja partyi i NDA.
Jak zajaviŭ na siońniašnim pasiadžeńni nižniaj pałaty namieśnik staršyni parłamienckaj kamisii pa dziaržaŭnym budaŭnictvie, miascovym samakiravańni i rehłamiencie Piotr Šykšnian, zakonaprajekt «skiravany na ŭdaskanaleńnie norm Vybarčaha kodeksa z ulikam praktyki jaho prymianieńnia». Pavodle jaho słoŭ, pryniaćcie prajekta «budzie spryjać kompleksnamu i ŭzhodnienamu rehulavańniu pytańniaŭ padrychtoŭki i praviadzieńnia vybaraŭ, zabieśpiačeńniu adkrytaści i hałosnaści vybarčaha pracesu».
Prajekt praduhledžvaje ŭniasieńnie ŭ vybarčaje zakanadaŭstva šerahu novaŭviadzieńnia.
Tak, prapanujecca praviadzieńnie vybaraŭ deputataŭ pałaty pradstaŭnikoŭ u adzin tur, pry hetym pieramožca ŭ ich budzie vyznačacca pavodle pryncypu adnosnaj bolšaści.
Płanujecca źmianić paradak finansavańnia vybarčych kampanij. U pryvatnaści, na prezidenckich vybarach budzie pavialičany z troch da dzieviaci tysiač bazavych vieličyń pamier asabistaha fondu kandydata. Pry hetym farmiravać jaho možna budzie nie paśla rehistracyi kandydata, a z momantu rehistracyi jaho inicyjatyŭnaj hrupy. Źmianiajucca abmiežavańni pry ŭniasieńni ŭ fond asabistych srodkaŭ kandydata. Pamier vybarčaha fondu kandydataŭ u deputaty Pałaty pradstaŭnikoŭ zastaniecca raniejšy — adna tysiača bazavych vieličyń, na miascovych vybarach u zaležnaści ad uzroŭniu savieta — da 10 i da 30 bazavych vieličyń.
U toj ža čas praduhledžana, što kandydatu nie buduć vydzialacca biudžetnyja srodki na vyrab pieradvybarnych materyjałaŭ.
Vyzvalenyja pry hetym srodki buduć nakiravany na vyrab vybarčymi kamisijami infarmacyjnych materyjałaŭ pra kandydataŭ. Infarmacyjnyja materyjały buduć nakiroŭvacca kožnamu vybarščyku razam z paviedamleńniem pra datu i čas hałasavańnia.
Zhodna z zakonaprajektam pry praviadzieńni vybarčych kampanij i kampanij pa refierendumie ŭvodzicca zabarona na ažyćciaŭleńnie dziejańniaŭ, jakija schilajuć da zryvu, admieny ci pieranosu terminu vybaraŭ, refierendumu.
Dakumient taksama abmiažoŭvaje koła asob, jakija majuć prava padavać zajavy ab paŭtornym padliku hałasoŭ. Ciapier hety pieralik nie vyznačany, ale pavodle novaha zakona takoje prava dadziena tolki kandydatam i vybarčym kamisijam.
Praduhledžana ŭstanavić miežavy 10-dzionny termin padačy zvarotaŭ ab parušeńni vybarčaha zakanadaŭstva paśla praviadzieńnia vybaraŭ ci refierendumu.
Akramia taho, zakonaprajekt dapaŭniaje pieralik pytańniaŭ, jakija nie mohuć vynosicca na respublikanski refierendum, ukazańniem na ŭstanaŭleńnie, źmianieńnie i admienu zboraŭ (pošlin).
Nieabchodna adznačyć, što paśla pryniaćcia zakonaprajekta ŭ pieršym čytańni demakratyčnyja partyi i arhanizacyi zrabili śpiecyjalnuju zajavu, u jakoj havaryłasia, što biełaruskija ŭłady ihnarujuć ich pryncypovyja prapanovy, skiravanyja na stvareńnie minimalnych zakanadaŭčych harantyj dla praviadzieńnia sumlennych i spraviadlivych vybaraŭ.
Pavodle mierkavańnia apazicyi, hetyja papraŭki ŭ Vybarčy kodeks «nie nabližajuć, a addalajuć Biełaruś ad mahčymaści praviadzieńnia svabodnych, spraviadlivych i prazrystych vybaraŭ».
U siońniašnim vystupleńni deputata Šykšniana nie prahučała infarmacyja, što pry padrychtoŭcy zakonaprajekta da druhoha čytańnia ŭ jaho byli ŭniesieny jakija-niebudź istotnyja papraŭki.
Kamientary