Ukrainski ŭrad prypyniaje padrychtoŭku Asacyjacyi ź ES, adnaŭlaje pieramovy z Rasijaj
Adpaviednaje rasparadžeńnie było apublikavana ŭ čaćvier.
U rasparadžeńni premjera Azarava havorycca ab prypynieńni padrychtoŭki padpisańnia Damovy ab asacyjacyi ź Jeŭrasajuzam, jakuju, jak mierkavałasia, Ukraina pavinna była padpisać u listapadzie ŭ Vilni na samicie Uschodniaha partniorstva.
Hetaje rašeńnie było pryniata «z metaj zabieśpiačeńnia nacbiaśpieki, bolš detalovaha vyvučeńnia dy raspracoŭki kompleksu zachadaŭ, jakija nieabchodna ździejśnić dla adnaŭleńnia stračanych abjomaŭ vytvorčaści dy kirunkaŭ handlova-ekanamičnych adnosin z Rasijskaj Fiederacyjaj dy inšymi dziaržavami SND».
U svaim rasparadžeńni premjer-ministr daručyŭ MZS, Minekanamraźvićcia i Minprampalityki Ukrainy prapanavać ES i Rasii utvaryć kamisiju na trochbakovaj asnovie dla raspracoŭki isnych pytańniaŭ.
«Adnavić aktyŭny dyjałoh z Rasijskaj Fiederacyjaj dy inšymi krainami Mytnaha sajuza dziela ažyŭleńnia handlova-ekanamičnych suviaziaŭ z metaju źbieražeńnia dy ŭzmacnieńnia supolnymi namahańniami ekanamičnaha patencyjału dziaržavy», — havorycca ŭ rasparadžeńni Azarava.
Takim čynam, možna kanstatavać, što cisk Rasii daŭ plon i Ukraina prypyniaje praces jeŭraintehracyi. Ad leta Maskva zrabiła niekalki pahroźlivych krokaŭ, u tym liku abmiežavała impart šerahu ŭkrainskich tavaraŭ, ad trubaŭ da cukierak.
Rasijski premjer Miadźviedzieŭ taksama papiaredziŭ, što ŭ vypadku padpisańnia Damovy ab svabodnym handli ź ES stvoryć niemahčymyja barjery na šlachu ŭkrainskich tavaraŭ.
Jeŭrasajuz abiacaŭ uzamien Ukrainie padtrymku, ale chutčej instytucyjnuju i kredytnuju, a nie žyvyja hrošy, jakija Ukraina hublaje ad rasijskich de-fakta sankcyj.
Apytanka
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary